"თავისუფალი დემოკრატების" წევრის დეპუტატ გიორგი ცაგარეიშვილის შეფასებით, პრეზიდენტ მიხეილ სააკაშვილის ტყუილებს "მოკლე ფეხები" გამოადგა.
ამის შესახებ ჟურნალისტებს ცაგარეიშვილმა პარლამენტში შემოსული 2011 წლის სახელმწიფო ბიუჯეტის ცვილილების შეფასებისას აღნიშნა და აქვე დასძინა, რომ ჯერ კიდევ თებერვალში პრეზიდენტმა სააკაშვილმა სოფლის მეურნეობისთვის დამატებით თანხების გამოყოფაზე ისაუბრა, კერძოდ კი "150 მილიონ ლარს დამატებით გამოვყოფთ იმისათვის, რომ შემდგომი ათწლეულების განმავლობაში და უახლოესი ერთი წლის განმავლობაში პირველი სერიოზული შედეგები დავინახოთ და ეს გაგვყვეს შემდეგი ათწლეულების განმავლობაში".
ცაგარეიშვილის თქმით, 150 მილიონი, რომელიც სოფლის მეურნეობის სამინისტროს დამატებით უნდა გამოყოფოდა "ბუნებაში არ არსებობს" და ამის ნაცვლად აღმოჩნდა, რომ 150 მილიონ ლარში შედის სამინისტროს უკვე დამტკიცებული ბიუჯეტი 69, 154 ათას ლარის ოდენობით, დასამატებელი კი დარჩა დაახლოები 81 მილიონი ლარი.
დეპუტატის განმარტებით, საბიუჯეტო ცვლილებებით კი დამტკიცებულ 69, 154 ათას ლარს ემატება 9, 154 ათასი ლარი და 78, 154 მილიონი ლარი ხდება, ხოლო
დანარჩენი დაახლოებით 72 მილიონი ლარის წყარო და პერსპექტივა კვლავ ბუნდოვანი რჩება.
"სააკაშვილმა ეს დაპირება ან "წამოროშა", ან მთავრობამ დამატებითი თანხების მობილიზება სოფლის მეურნეობის პროგრამებისთვის, ვერ მოახერხა", - აღნიშნა ცაგარეიშვილმა.
როგორც ცნობილია, 2011 წლის სახელმწიფო ბიუჯეტის პროექტის მიხედვით შემოსავლების ნაწილი 348.8 მილიონი ლარით იზრდება, საიდანაც სოფლის მეურნეობის სამინისტროს მხოლოდ 9 მილიონი დაემატება.
