პრეზიდენტ მიხეილ სააკაშვილის მტკიცებით, საქართველო სიმინდის ექსპორტიორი ქვეყანა წელსვე გახდება.
"საქართველო წელს პირველად გახდება სიმინდის ექსპორტიორი ქვეყანა. დაინტერესება მოდის რამდენიმე ქვეყნიდან, მათ შორის აზერბაიჯანიდან და თურქეთიდან. ამ ჩამონათვალში კიდევ რამდენიმე ქვეყანაა", - ქვეყნის პირველი პირის ეს განცხადება ჟურნალისტებს დღეს გამართულ ტრადიციულ პრესკონფერენციაზე მისმა პრესსპიკერმა მანანა მანჯგალაძემ გააცნო.
ამასთან, პრეზიდენტის თქმით, გარანტირებულად გავა ექსპორტზე ყველა იმ ფერმერის მიერ მოწეული სიმინდის მოსავალიც, რომელმაც ჰიბრიდული ჯიშის სიმინდის დათესვის თაობაზე დაინტერესება გამოთქვა.
"ფერმერების მიერ მოწეული მოსავალი გარანტირებულად გავა ექსპორტზე, რაც მნიშვნელოვანი მოტივაციაა მწარმოებლებისთვის", - მიაჩნია სააკაშვილს.
გარდა ამისა, ქვეყნის პირველი პირი უხვმოსავლიანი და ჰიბრიდული ჯიშის სიმინდის თესლის დათესვასთან დაკავშირებით ფერმერებისა და გლეხების დაინტერესების მაჩვენებლითაც კმაყოფილია და აცხადებს, რომ შესაბამისი რეგისტრაცია უკვე 35 ათასზე მეტ ფიზიკურ და იურიდიულ პირს აქვს გავლილი.
"რეგისტრაციის პროცედურა აპრილის ბოლომდე გაგრძელდება. გარდა დასავლეთ საქართველოსა, სადაც სიმინდი ტრადიციული კულტურაა, პროექტში ჩართვასთან დაკავშირებით მაღალია კახეთის რეგიონის, კერძოდ კი ლაგოდეხის დაინტერესებაც. ეს საინტერესო და ახალი ტენდენციაა", - მიიჩნევს საქართველოს პრეზიდენტი.
