დოკუ უმაროვი, შესაძლოა, ინგუშეთში ჩატარებული სპეცოპერაციისას სხვა ბოევიკებთან ერთად იყოს მოკლული. ამის შესახებ დღეს ორი რუსული გამოცემა - "რასიისკაია გაზეტა" და "კომერსანტი" წერს.
საინფორმაციო საშუალებების წყაროები აცხადებენ, რომ ინგუშეთში ჩატარებული სპეცოპერაციის მიზანი სწორედ უმაროვის განადგურება იყო.
ოპერატიული ღონისძიებები გასული წლის შემოდგომიდან ტარდებოდა, მას შემდეგ, რაც გაჩნდა ინფორმაცია, რომ უმროვმა დროებით საცხოვრებლად ინგუშეთის, ჩეჩნეთისა და ჩრდილოეთ ოსეთის საზღვრებთან მდებარე სუნჟენის ტყე აირჩია.
არის თუ არა უმაროვი მოკლულებს შორის ამის დადგენა უახლოეს დღეებში, ექსპერტიზის დასრულების შემდეგ იქნება შესაძლებელი.
„ტყეში ნაპოვნია 16 გვამი, მათი ვინაობა ჯერ დაზუსტებული არაა. ოპერაციის მონაწილეები მხოლოდ ვარაუდობენ, რომ მათ შორის შესაძლოა იყოს ხაზმატი და ასევე თავად დოკუ უმაროვი", - წერს „კომერსანტი.
შეგახსენებთ, რომ რუსეთის ეროვნულმა ანტიტერორისტულმა კომიტეტმა გაავრცელა იმფორმაცია, რომ ინგუშეთში ჩატარებული სპეცოპერაციის შედეგად 17 ბოევიკი გაანადგურეს, დაკავებულია ორი ადამიანი, რომლებიც „დომოდედოვოში" მომხდარ აფეთქებასთან არიან კავშირში.
