რუსების მიერ გაგრის მიმდებარე ტერიტორიების მითვისების შემთხვევაში აფხაზეთსა და რუსებს შორის ომის დაწყება გამორიცხული არ არის. ამის შესახებ ვიცე-სპიკერმა პაატა დავითაიამ აფხაზურ-რუსული ე.წ. სახელმწიფო საზღვრის დელიმიტაცია-დემარკაციის საკითხებისადმი მიძღვნილი სხდომის შეფასებისას განაცხადა.
"ამ მიმართულებით აფხაზეთში მართლაც სერიოზული პრობლემებია. აღნიშნული საკითხის განხილვის დაწყებას აფხაზური მოსახლეობის და პოლიტიკური პარტიების მხრიდან მკვეთრი რეაქცია მოჰყვა", - აღნიშნა დავითაიამ და დასძინა, რომ ამ საკითხთან დაკავშირებით აფხაზებსა და ქართველებს შორის პოზიციების თანხვედრაა.
მისი თქმით, საუბარი ეხება რუსებისთვის გუდაუთის ტერიტორიიდან რიწის გადასახვევის შემდეგ ტერიტორიების, მათ შორის რიწის ტბის გადაცემას.
"თუ სეპარატისტები ამ გადაწყვეტილებას მიიღებენ, აფხაზები საკუთარი ტერიტორიის დასაცავად იარაღს აიღებენ და რუსებს და აფხაზებს შორის ომი გარდაუვალი იქნება", - დასძინა დავითაიამ.
დეპუტატის შეფასებით, აფხაზებმა უნდა გაიგონ, რომ რუსეთის მიზანი აფხაზეთის დამოკიდებლობა არ ყოფილა და მათ ერთადერთ მიზანს სწორედ აფხაზეთის ტერიტორიის მითვისება წარმოადგენდა.
"აფხაზეთს მომავალი მხოლოდ საქართველოს შემადგენლობაში აქვს, სადაც შეძლებს არა მხოლოდ თვითმყოფადობის შენარჩუნებას, არამედ ძლიერ სუბიექტად ჩამოყალიბებას", - აღნიშნა დავითაიამ.
შეგახსენებთ, რომ მოსკოვში სს სამინისტროში ე.წ. რუსულ აფხაზური ორმხრივი კომისია იქმნება, რომელიც "რუსეთის ფედერაციასა და აფხაზეთს შორის არსებული სახელმწიფო საზღვრის დელიმიტაცია დემარკაციის სამუშაო საკითხებს განიხილავს".
აღნიშნულთან დაკავშირებით, სეპარატისულ აფხაზეთში მოქმედი პოლიტიკური პარტია "სახალხო ერთიანობის ფორუმი" საგანგებო განცხადებას აქვეყნებს და აღნიშნავს, რომ აფხაზურ საზოგადოებაში არის მოსაზრება იმის შესახებ, რომ სხდომაზე შესაძლოა მოსკოვმა აფხაზეთის ტერიტორიის 160 კილომეტრის დათმობა მოითხოვოს.
