"მაშფოთებს ჩრდილოკავკასიასთან დაკავშირებით ევროკავშირის გაურკვეველი ვითარება. მიკვირს, რატომ არის ის რუსეთის მიმართ საკმაოდ რბილი", - ამის შესახებ რადას დეპუტატმა ანდრეი შკილიმ თბილისში, ნატოს საპარლამენტო ასამბლეის როუზ-როსის 76-ე სემინარის ფარგლებში გამართული დისკუსიისას განაცხადა.
მისივე განმარტებით, დასავლეთმა რუსეთის თამაში კი არ უნდა ითამაშოს, არამედ მასთან ურთიერთობებს გადახედოს.
"გაურკვეველია, რატომ თამაშობს დასავლეთი რუსეთის თამაშს? მან ჩრდილოეთ კავკასიასთან დაკავშირებით თავისი ძირითადი პოზიცია უნდა გამოკვეთოს. გარდა ამისა, რუსეთი ის სახელმწიფოა, რომელსაც არც საქართველოს წინაშე 2008 წლის ომის შემდეგ აღებული ვალდებულებები არ შეუსრულებია, ის არის ქვეყანა, სადაც კლავენ ჟურნალისტებს, ხდება ძალადობა. ვფიქრობ, ევროკავშირმა ამ ყველაფრის შესახებ მინიმუმ საკუთარი პოზიცია უნდა გამოკვეთოს, კარგი იქნება, თუ მოსკოვთან ურთიერთობებსაც გადახედავს", - აღნიშნა რადას დეპუტატმა, რომელიც აღნიშნულ სემინარზე უკრაინის დელეგაციას ხელმძღვანელობდა.
შეგახსენებთ, რომ როუზ-როსის სამდღიანი სემინარი 23 მარტს გაიხსნა და დღეს დაიხურა. სემინარის მონაწილეები საქართველოდან გამგზავრებამდე ცხინვალის ადმინისტრაციული საზღვრის, წეროვანში დევნილთა დასახლების, მცხეთის და თბილისის ღირსშესანიშნაობების მონახულებასა და დათვალიერებასაც აპირებენ.
