ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის კობა სუბელიანის განცხადებით, დევნილი ნანა ფიფიას თვითმკვლელობა მისთვის ტრაგედიაა.
როგორც სამთავრობო დებატების დროს სუბელიანმა აღნიშნა, ნანა ფიფია რეგისტრირებული იყო ზუგდიდში, შემდგომში იგი გადმოვიდა საცხოვრებლად თბილისში და ბინით დაკმაყოფილებას ითხოვდა.
მინისტრმა განმარტა, რომ სამინისტრომ ფიფიას წერილობით შესთავაზა ფართი ზუგდიდში, რადგან თბილისში დაკმაყოფილების საშუალება არ არსებობდა.
"ნანა ფიფიას თავის დაწვის ფაქტი, რომელის აფიშირებასაც თქვენ აკეთებთ, თუ ვინმესთვის ტრაგედიას წარმოადგენს, ეს პირველ რიგში ჩემი ტრაგედიაა", - დასძინა მინისტრმა სუბელიანმა.
შეგახსენებთ, რომ ფრაქცია "ქრისტიან-დემოკრატების" თავმჯდომარემ გიორგი ახვლედიანმა სუბელიანს ნანა ფიფიას თავის დაწვის ფაქტი შეახსენა და აღნიშნა, რომ დევნილი მისი სამინისტროს არასწორმა პოლიტიკამ მიიყვანა თვითმკვლელობამდე, რაც სისხლის სამართლის დანაშაულია.
