სეპარატისტულმა აფხაზეთმა რუსეთის მიერ მიმდინარე წელს აფხაზეთის სოციალ-ეკონომიკური განვითარებისთვის გამოყოფილი 3 მილიარდი რუბლიდან 1 მილიარდზე მეტი უკვე აითვისა. ეს განცხადება სეპარატისტული აფხაზეთის ე. წ. ეკონომიკის მინისტრმა კრისტინა ოზგანმა გააკეთა.
"2010 წელს 3 მილიარდი რუბლით დაფინანსების ოთხი რეესტრი იყო გახსნილი, მათ შორის 1, 5 მილიარდი რესპუბლიკაში ივნის-აგვისტოში შემოვიდა, დანარჩენი 1,5 მილიარდი - დეკემბრის 20-იან რიცხვებში. მიმდინარე წლის 1-ლი მარტის მონაცემებით, ათვისებულია 1 მილიარდ რუბლზე მეტი", _ განაცხადა ოზგანმა დღეს მოსკოვში მიმდინარე რუსეთისა და აფხაზეთის ე. წ. მთავრობათაშორის სხდომაზე, რომელიც მოსკოვისა და სოხუმის სოციალ-ეკონომიკურ თანამშრომლობას ეძღვნებოდა.
სხდომაზე რუსეთის რეგიონების მინისტრმა ვიქტორ ბასარგინმა განაცხადა, რომ სულ აფხაზეთის განვითარებისთვის 2010-2012 წლებში რუსეთი აპირებს 11 მილიარდის გამოყოფას. თავის მხრივ, რუსეთის რეგიონების მინისტრის მოადგილემ რომან პანოვმა განაცხადა, რომ უახლოეს მომავალში აფხაზეთისთვის გამოყოფილი იქნება 800 მილიონი რუბლი 2011 წელს დაგეგმილი 3 მილიარდიდან.
დღეს რუსეთის დედაქალაქში, კერძოდ კი რეგიონული განვითარების სამინისტროში, რუსეთისა და სეპარატისტული აფხაზეთის ე.წ. მთავრობათაშორისი კომისიის სხდომა გაიმართა, რომელიც მოსკოვისა და სოხუმის თანამშრომობის საკითხებს ეძღვნებოდა.
