აშშ-ის სენატის ორპარტიულმა ჯგუფმა, რომელშიც 14 სენატორი შედის, პრეზიდენტ დონალდ ტრამპს მოუწოდა, რუსეთის პრეზიდენტ ვლადიმირ პუტინს 'დიდი ოცეულის" (G20-ის) სამიტზე მიწვევა გაუუქმოს. სენატორებმა აღნიშნულთან დაკავშირებით ტრამპს წერილით მიმართეს. ამის შესახებ The Washington Post სენატორების წერილზე დაყრდნობით იუწყება.
მათი თქმით, პუტინის მონაწილეობა აშშ-ში დაგეგმილ G20-ის სამიტში „სერიოზულ შეშფოთებას იწვევს“, რადგან, მათი შეფასებით, ეს შეიძლება უკრაინის წინააღმდეგ ომის მწარმოებელი რუსეთის ხელისუფლების ლეგიტიმიზაციასა და ნორმალიზებას შეუწყოს ხელი.
„პუტინი სრულად არის პასუხისმგებელი რუსეთის მიერ უკრაინის წინააღმდეგ სრულმასშტაბიანი აგრესიული ომის დაწყებაზე“, - ნათქვამია სენატორების წერილში.
სენატორებმა ასევე აღნიშნეს, რომ პუტინი, რუსეთის ფინანსთა მინისტრი ანტონ სილუანოვი და რუსეთის დელეგაციის სხვა წევრები აშშ-ის სანქციების ქვეშ იმყოფებიან იმ ქმედებების გამო, რომლებიც ვაშინგტონის შეფასებით, აშშ-ის ეროვნული უსაფრთხოებისთვის საფრთხეს წარმოადგენს.
სენატორების განცხადებით, პუტინის საერთაშორისო იზოლაციის არარსებობამ შესაძლოა მას უკრაინასთან ცეცხლის შეწყვეტაზე შეთანხმების მოტივაცია შეუმციროს.
სამიტი დეკემბერში მაიამიში იმართება.
