რუსეთის პრეზიდენტის ვლადიმირ პუტინის განცხადებით, ბალტიის ქვეყნებში რუსულენოვანი მოსახლეობის უფლებები ირღვევა, თუმცა აღნიშნა, რომ რუსეთი საერთაშორისო სამართლის ფარგლებში რეაგირებს.
„ჩვენ ვიცით, რომ იქ, ბალტიის ქვეყნებში, რუსულენოვანი მოსახლეობის უფლებები ირღვევა. მაგრამ ჩვენ უკვე ვიცით, როგორ ვუპასუხოთ ამას და გარკვეული მიდგომა შევიმუშავეთ. ჩვენ ვრეაგირებთ ჰუმანიტარული სამართლის, საერთაშორისო სამართლის ფარგლებში“, - განაცხადა პუტინმა პრესკონფერენციაზე.
პუტინმა ასევე ისაუბრა ევროპაში შექმნილ დაძაბულ ვითარებაზე და ევროკავშირის ქვეყნების განცხადებებს რუსეთის მხრიდან მომდინარე საფრთხის შესახებ მიზანმიმართულ პროვოკაცია უწოდა.
„კიდევ ერთხელ მინდა ხაზი გავუსვა: ჩვენ ევროპასთან რაიმე საბრძოლო მოქმედებისთვის არ ვემზადებით. ასეთი გეგმები არ გვაქვს და, რაც მთავარია, ამის არანაირი საფუძველი არ არსებობს. ევროპასთან ვითარების გამწვავების არანაირი რეალური მოტივი არ გვაქვს“, - განაცხადა რუსეთის პრეზიდენტმა.
მისი თქმით, ევროკავშირი ევროპელებს განზრახ ატყუებს, რათა „უკრაინელები საზარბაზნე ხორცად გამოიყენოს“.
