რუსეთის მიერ უკრაინის დასავლეთ ნაწილზე, პოლონეთის საზღვართან ახლოს, განხორციელებული იერიშების გამო პოლონეთმა ლუბლინისა და ჟეშუვის აეროპორტებში ფრენები დროებით შეაჩერა.
როგორც Reuters წერს, პოლონეთში საჰაერო განგაშის სიგნალები ჩაირთო, ხოლო ქვეყნის შეიარაღებულმა ძალებმა სამხედრო ავიაცია აამოქმედეს. პოლონეთის არმიის განცხადებით, ქვეყნის საჰაერო სივრცის დარღვევა არ დაფიქსირებულა.
პოლონეთის პრემიერ-მინისტრმა დონალდ ტუსკმა განაცხადა, რომ უკრაინის დასავლეთ ნაწილზე „მასშტაბური იერიში“ განხორციელდა, რომელიც პოლონეთის საზღვართან ძალიან ახლოს იყო.
პოლონეთის შეიარაღებული ძალების ოპერატიული სარდლობის წარმომადგენლის, ვიცე-პოლკოვნიკ იაცეკ გორიშევსკის განცხადებით, დრონი პოლონეთის საზღვრიდან დაახლოებით 4 კილომეტრში ჩამოვარდა ან ჩამოაგდეს.
პოლონეთის არმიის განცხადებით, სამხედრო ავიაციის ოპერაციის დასრულების შემდეგ ლუბლინისა და ჟეშუვის აეროპორტებმა მუშაობა განაახლეს.
