პოლონეთის პრემიერ-მინისტრის, დონალდ ტუსკის განცხადებით, სადაზვერვო მონაცემები მიუთითებს, რომ რუსეთს უკრაინის მხარდამჭერი ქვეყნების, მათ შორის პოლონეთის, წინააღმდეგ ჰიბრიდული თავდასხმების განხორციელების გეგმები აქვს.
ამის შესახებ ტუსკმა 17 სექტემბერს, 1939 წელს საბჭოთა კავშირის მიერ პოლონეთში შეჭრის 87-ე წლისთავისადმი მიძღვნილ ღონისძიებაზე განაცხადა.
ტუსკის თქმით, დაზვერვის შეფასებით, არსებობს „დრონებისა და რაკეტების გამოყენებით ჰიბრიდული თავდასხმების გეგმები უკრაინის მხარდამჭერი ქვეყნების, მათ შორის პოლონეთის, წინააღმდეგ“.
მისივე განცხადებით, ამ საკითხზე არსებული უახლესი სადაზვერვო მონაცემები „ძალიან თანმიმდევრული და დამაჯერებელია“.
ტუსკი ელოდება, რომ რუსეთი შეეცდება, ნებისმიერი მსგავსი ინციდენტი „შემთხვევითობად“ წარმოაჩინოს.
„არსებობს რეალური რისკი იმისა, რომ დრონები ან სხვა ტიპის ჭურვები აღმოსავლეთ ფლანგზე მდებარე ნატო-ს ერთი ან რამდენიმე ქვეყნის ტერიტორიაზე გაისროლონ და შესაძლოა ზიანიც მიაყენონ, ოფიციალური ვერსია კო იქნება ის, რომ ეს უბედური შემთხვევაა და რომ ნატო-ს რეაგირების მოლოდინის საფუძველი არავის აქვს“, - განაცხადა ტუსკმა.
ტუსკის თქმით, ამის მიზანია ნატო-ს „შესაბამისი დებულებების“ ამოქმედების გადაწყვეტილების პარალიზება ან, სულ მცირე, ალიანსის მზადყოფნის შესუსტება.
„მიზანი იქნება, ზოგადად, ნატო-ს ერთიანობის შერყევა და, უპირველეს ყოვლისა, წევრი ქვეყნების დარწმუნება იმაში, რომ მე-5 მუხლს უფრო თეორიული, ვიდრე პრაქტიკული მნიშვნელობა აქვს - ანუ გაჩნდეს მოსაზრება, რომ ლატვიის ან ლიეტუვის გამო სიკვდილი არავის მოუნდება, იმის გათვალისწინებით, რომ საქმე გვაქვს ინციდენტებთან და არა ომის გამოცხადებასთან“, - განაცხადა პოლონეთის პრემიერ-მინისტრმა.
