უკრაინის საგარეო საქმეთა მინისტრმა ანდრი სიბიჰამ განაცხადა, რომ უკრაინის პრეზიდენტ ვოლოდიმირ ზელენსკისა და აშშ-ის პრეზიდენტ დონალდ ტრამპის ნიუ იორკში დაგეგმილი შეხვედრის ერთ-ერთი მთავარი შედეგი შესაძლოა ენერგეტიკულ და საზღვაო სფეროებში ცეცხლის შეწყვეტის შეთანხმების მიღწევა გახდეს.
ამის შესახებ სიბიჰამ სლოვენიის საგარეო საქმეთა მინისტრ ტონე კაიცერთან ერთობლივ პრესკონფერენციაზე განაცხადა.
„ჩვენ მივესალმებით ჩვენი პარტნიორების, მათ შორის აშშ-ის ძალისხმევას, რომელიც ამ მიზნის მიღწევისკენ არის მიმართული და მიგვაჩნია, რომ სწორედ აშშ-ის აქტიური მონაწილეობით ამის რეალურად მიღწევა შესაძლებელია. ჩვენ ვემზადებით პრეზიდენტ ზელენსკისა და პრეზიდენტ ტრამპის შეხვედრისთვის გაერო-ს გენერალური ასამბლეის ფარგლებში და ვფიქრობ, რომ ეს შეიძლება ამ შეხვედრის ერთ-ერთი მთავარი შედეგი გახდეს - ზავის მიღწევა“, - განაცხადა სიბიჰამ.
მისი თქმით, საუბარია ერთდროულად ენერგეტიკის სფეროსა და შავ ზღვაში ცეცხლის შეწყვეტაზე.
სიბიჰას განცხადებით, უკრაინას სურს, ომი დასრულდეს.
„ჩვენ გვაქვს წინადადებები და ხედვა, თუ როგორ უნდა მივიდეთ ამ მიზნამდე. გვჭირდება საერთაშორისო საზოგადოების მხარდაჭერა და უნდა დავივიწყოთ ნებისმიერი ილუზია რუსეთის კეთილგანწყობილ განზრახვებთან დაკავშირებით. რუსეთს მხოლოდ ზეწოლა ესმის“, - განაცხადა უკრაინის საგარეო საქმეთა მინისტრმა.
