ბიძინა ივანიშვილის „ქართულმა ოცნებამ“, რომელმაც 14 წელიწადში ქართველი ხალხი უკიდურესად გააღარიბა, ისევე როგორც 2012 წელს, ქართველ ხალხს ახალ შოუს სთავაზობს, – ამის შესახებ „ლელო – ძლიერი საქართველოს“ წევრმა, თაზო დათუნაშვილმა განაცხადა.
მისი თქმით, პოლიტიკურად გაკოტრებულმა, არალეგიტიმურმა პარტიამ, რომელიც ხელისუფლებაში უფასო ფულის და ცხოვრების გაიაფების დაპირებით მოვიდა, დღეს გადაწყვიტა „ებრძოლოს“ მის მიერვე უკიდურესად გაძვირებულ ცხოვრებას.
„ყოველდღიურად ჩვენ ვხედავთ ფასადურ ე.წ. საქმიან თათბირებს, შეხვედრებს, რომელსაც ბუტაფორიული პრემიერი მართავს სხვადასხვა სფეროს წარმომადგენლებთან, დღეს, მაგალითად, ის ფარმაცევტულ კომპანიებს ხვდება და მორიგი დაპირებით კვებავს საზოგადოებას, რომ უახლოეს დღეებში ცხოვრება შემსუბუქდება.
ამასობაში, ამ ფასადური შეხვედრების ფონზე, ფასები არათუ იკლებს, პირიქით, იმატებს, მათ შორის პროდუქტზე, ტრანსპორტზე და სერვისების მომსახურებაზე, აი, ამ პრობლემაზე, სამწუხაროდ, არავინ საუბრობს და მე მინდა, ხაზგასმით გავამახვილო ამ თემაზე ყურადღება – სერვისების მომსახურება როგორიც არის: პირადობის მოწმობა და პასპორტის აღება; ჯარიმები – (Tbilisi Parking); ნებართვები; რეგისტრაციები.
ამ სახელმწიფო სერვისებიდან ამონაგები თანხა პირდაპირ „ოცნების“ შავ სალაროში მიდის – სრულად კონტროლდება სახელმწიფოს მიერ! 2012 წლიდან დღემდე სერვისების მომსახურების ღირებულება 200%-მდე არის გაზრდილი. თვალსაჩინოებისთვის ეს მონაცემებიც საკმარისია, რომ „ოცნების“ რეალური სახე დავინახოთ, სერვისების ღირებულების ფასები, თავიდან ბოლომდე, ერთპიროვნულად მხოლოდ მთავრობის რეგულაციაა და ირაკლი კობახიძის კეთილ ნებაზეა დამოკიდებული ეს ტარიფები!
საქართველოში ცხოვრება 200 %-ით გაძვირდა და ამაში დამნაშავე არის ერთადერთი კაცი ბიძინა ივანიშვილი. ბიძინა აძვირებს და ბიძინა აღარიბებს ხალხს – რათა მართოს. კანცელარიაში გამართული ფასადური ე.წ. საქმიან თათბირები არის პროპაგანდა და ტოტალური ტყუილი, რათა მთავრობამ აჩვენოს ყალბი ბრძოლა ფასების წინააღმდეგ, რომელიც მათივე და მათთან დაკავშირებული კომპანიების დაწესებულია და თავადვე ზრდიან. „ძლიერი საქართველო – ლელო“ ყოველდღიურ რეჟიმში იქნება ჩართული ამ თემაში და ჩვენ ვამხელთ ამ ხელისუფლების ყველა ტყუილს. ყველა პროპაგანდისტულ ქმედებას“, – აცხადებს თაზო დათუნაშვილი.
