"ბაბუაჩემები მსხვერპლები იყვნენ (რეპრესირებულები), მაგრამ მე არ მივიჩნევ თავს მსხვერპლად იმიტომ, რომ ბოლოს მაინც ჩვენ გავიმარჯვებთ. რა სასჯელსაც მომისჯით, პატივი იქნება ჩემთვის, - განაცხადა სასამართლო სხდომაზე გზის გადაკეტვის ბრალდებით დაკავებულმა ნინო სვანიძემ.
მოსამართლემ ნინო სვანიძე სამართალდამრღვევად ცნო და მას 5- დღიანი პატიმრობა შეუფარდა.
მოსამართლემ საბა ხომერიკს 8 - დღიანი ადმინისტრაციული პატიმრობა განესაზღვრა. გელა გამყრელიძე სიტყვიერი შენიშვნის საფუძველზე დარბაზიდან გაათავისუფლეს.
ასევე, მოსამართლემ ცალკე წარმოებად გამოყო ვახტანგ მაჭავარიანის საქმე, ვინაიდან, მან სასამართლო პროცესზე გააჟღერა, რომ მას ჯანმრთელობის პრობლემა აქვს და მოსამართლემ აღნიშნულის დამადასტურებელი დოკუმენტის წარსადგენად გარკვეული დრო განუსაზღვრა. ის სხდომათა დარბაზიდან გათავისუფლდა.
რაც შეეხება სხვა პირთა ადმინისტრაციულ საქმეებს, მოსამართლე ზვიად ცეკვავამ დაკავებული გიორგი ყიასაშვილი ადმინისტრაციულ სამართალდამრღვევად ცნო და მას 6-დღიანი ადმინისტრაციული პატიმრობა შეუფარდა, 18 ოქტომბერს რუსთაველის გამზირზე, აქციაზე სახის დაფარვის გამო. ასევე, ლაშა ნაჭყებიას 4 დღიანი ადმინისტრაციული პატიმრობა განუსაზღვრა.
შსს-ს ინფორმაციით, რუსთაველის გამზირზე 18 ოქტომბერს მიმდინარე აქციასთან დაკავშირებით ადმინისტრაციულ სამართალდარღვევათა კოდექსის შესაბამისად, 14 სამართალდამრღვევი პირი დააკავეს, ადმინისტრაციული წარმოება მიმდინარეობს 13 პირის მიმართ.
ადმინისტრაციულ სამართალდარღვევათა კოდექსში შესული ცვლილებით, შეკრებისა და მანიფესტაციის მონაწილე უალტერნატივოდ 15 დღემდე ვადით ადმინისტრაციული პატიმრობით დაისჯება ტრანსპორტის სავალი ნაწილის ნაწილობრივ ან სრულად გადაკეტვისთვის, თუ რაოდენობის გათვალისწინებით აქციის ჩატარება სხვაგვარად შესაძლებელია.
ფოტო: რადიო თავისუფლება
