ინდოეთის პრემიერ-მინისტრმა ნარენდრა მოდიმ 9 მაისს მოსკოვში ჩასვლაზე უარი თქვა.

ის, რომ მოდის არ მიუღია რუსეთის პრეზიდენტის, ვლადიმირ პუტინის მიწვევა, მონაწილეობა მიეღო მეორე მსოფლიო ომში გერმანიაზე გამარჯვების 80 წლისთავისადმი მიძღვნილ საზეიმო ღონისძიებებში, კრემლის პრესმდივანმა დმიტრი პესკოვმა ოთხშაბათს, 30 აპრილს, განაცხადა.

მისი თქმით, მოდიმ ოფიციალური მოწვევა აპრილის დასაწყისში მიიღო, თუმცა „არ ჩამოვა“.

„ინდოეთი წარმოდგენილი იქნება, მაგრამ არა უმაღლეს დონეზე“, - აღნიშნა პესკოვმა, თუმცა ინდოეთის პრემიერ-მინისტრის უარის მიზეზებზე არაფერი უთქვამს.

კრემლის პრესსპიკერმა ასევე განაცხადა, რომ ჩინეთის პრეზიდენტი სი ძინპინი 9 მაისის აღლუმს დაესწრება. პესკოვის თქმით, მის ვიზიტს მოსკოვში „დიდი მნიშვნელობა ენიჭება და ამისთვის მზადება მიმდინარეობს“.

როგორც The Moscow Times აღნიშნავს, მოსკოვი 9 მაისს 20 ქვეყნის ლიდერების ჩასვლას ელოდება, მათ შორის ბრაზილიის პრეზიდენტის ლუის ინასიუ ლულა და სილვას, სლოვაკეთის პრემიერ-მინისტრის რობერტ ფიცოს, სერბეთის პრეზიდენტის ალექსანდარ ვუჩიჩის, ვენესუელის ლიდერის ნიკოლას მადუროს, კუბის პრეზიდენტის მიგელ დიას-კანელის და მონღოლეთის პრეზიდენტის უხნააგიინ ხურელსუხის. მედიის ცნობით, აღლუმში პირველად ჩრდილოეთ კორეის სამხედრო მოსამსახურეები მიიღებენ მონაწილეობას.