რუსეთის პრეზიდენტმა ვლადიმირ პუტინმა 29 აპრილს ხელი მოაწერა განკარგულებას, რომლის თანახმადაც ქალაქ ვოლგოგრადის აეროპორტს სახელწოდება "სტალინგრადი" მიენიჭა.
"1941-1945 წლების დიდ სამამულო ომში საბჭოთა ხალხის გამარჯვების უკვდავსაყოფად ვოლგოგრადის საერთაშორისო აეროპორტს მიენიჭოს ისტორიული სახელწოდება "სტალინგრადი". - ნათქვამია კრემლის ვებგვერდზე გამოქვეყნებულ განკარგულებაში.
განკარგულების ხელმოწერამდე რამდენიმე საათით ადრე, რეგიონის ხელმძღვანელმა, ვოლგოგრადის რეგიონის ვეტერანების სახელით, პუტინს მიმართა თხოვნით, აეროპორტისთვის „სტალინგრადის“ სახელი დაებრუნებინა.
ქალაქ ვოლგოგრადს, სადაც აეროპორტი მდებარეობს, 1925 წელს იოსებ სტალინის პატივსაცემად სახელი "სტალინგრადი" ეწოდა, თუმცა მოგვიანებით, 1961 წელს დესტალინიზაციის ფარგლებში, ქალაქს კვლავ ვოლგოგრადი დაერქვა.
