აშშ-ის პრეზიდენტის სპეციალურმა წარმომადგენელმა, კიტ კელოგმა, უარყო რუსეთის პრეზიდენტის, ვლადიმირ პუტინის მიერ გამოცხადებული „სამდღიანი ზავის“ წინადადება და განაცხადა, რომ შეერთებული შტატები დაინტერესებულია გრძელვადიანი ზავით. ამის შესახებ კელოგმა Fox News-თან ინტერვიუში ისაუბრა.
კელოგმა, ბოლო დღეებში „სამშვიდობო მოლაპარაკებების“ მიმდინარეობის კომენტირებისას, გამოთქვა რწმენა, რომ შეერთებული შტატები „საკმაოდ კარგ პოზიციაშია უკრაინელებთან დაკავშირებით“.
„სამდღიანი ცეცხლის შეწყვეტა აბსურდულია, ის, რაც პრეზიდენტს სურს, არის ცეცხლის მუდმივი, ყოვლისმომცველი შეწყვეტა , - თქვა მან პუტინის მიერ 8-10 მაისისთვის შეთავაზებულ ცეცხლის შეწყვეტაზე საუბრისას.
ტრამპის წარმომადგენელმა განაცხადა, რომ ის მხარს უჭერს ყოვლისმომცველ ზავს „ზღვაზე, ჰაერში, ხმელეთზე, ინფრასტრუქტურის მიმართ“ სულ მცირე 30 დღის განმავლობაში, შემდეგ კი შესაძლებელია მისი გახანგრძლივება.
„და თუ გავითვალისწინებთ იმ ყველაფერს, რასთანაც უკრაინელები მზად არიან თანამშრომლობისთვის, მაშინ ყველაფერი რუსებზე, პუტინზეა დამოკიდებული.
ანუ, ერთი მხარე დათანხმდა, ახლა მეორე მხარესთან უნდა ვისაუბროთ. და მე ვფიქრობ, რომ ჩვენ ამასთან ახლოს ვართ“, - თქვა კელოგმა.
შეგახსენებთ, 28 აპრილს რუსეთის პრეზიდენტმა, ვლადიმირ პუტინმა მეორე მსოფლიო ომში გამარჯვების 80 წლისთავის აღსანიშნავ დღეებში უკრაინაში ცეცხლის შეწყვეტა გამოაცხადა.
