საკონსტიტუციო სასამართლოში ოპოზიციური პარტიების აკრძალვაზე სარჩელის განხილვა გრძელდება. საკონსტიტუციოს თავმჯდომარის, რევაზ ნადარაიას თქმით, მას "არ ჰგონია", რომ გადაწყვეტილების გამოცხადება ერთ თვეში მოესწროს.
ნადარაიამ ეს განცხადება "გახარია-საქართველოსთვის" წარმომადგენლის, ანა ბუჩუკურის კითხვის საპასუხოდ გააკეთა, რომელმაც მას შეკითხვა შესაგებლის წამოსადგენად ვადების თაობაზე დაუსვა. რევაზ ნადარაიამ გახარიას გუნდის წევრებს უთხრა, რომ მათ შეუძლიათ ამ 30 დღეში წარმოადგინონ შესაგებელი.
"მე ვერ გავიგე, ანუ 30 დღე ვადა, რომელიც ჩვენ გვაქვს პასუხის წარმოსადგენად, 29-ე დღეს რომ წარმოვადგინო, მაგრამ თქვენ უკვე გადაწყვეტილება გქონდეთ მიღებული, ამითი ჩემი უფლებები ხომ ირღვევა? ეს ნიშნავს თუ არა იმას, რომ თქვენ გადაწყვეტილებას ვერ მიიღებთ იქამდე, სანამ პასუხის წარმოსადგენად ჩვენი ვადა არ ამოიწურება?" - ჰკითხა ბუჩუკურმა ნადარაიას, რაზეც მან უპასუხა:
"თუ თქვენ შესაგების რაიმე განმარტების წარმოდგენა გნებავთ, ეს სათათბიროში გასვლის შემდეგაც კი შეგიძლიათ. მაგრამ, ეს ვადა არ ზღუდავს სასამართლოს, თუ განხილვა დასრულდება...ახლა, არა მგონია, რომ 30 დღეში სასამართლომ განხილვა და გადაწყვეტილების გამოცხადება მოასწროს - მაგრამ, ეს ვადა არ ზღუდავს სასამართლოს, რომ 30 დღეში გადაწყვეტილება წარმოადგინოს. ეს არის იმის ვადა, რომ მხარემ ბოროტად არ ისარგებლოს მუდმივად ამ შესაგებლის წარმოდგენის ვადით" - თქვა ნადარაიამ.
პლენუმმა სარჩელის განხილვის გადადების შესახებ "გახარია-საქართველოსთვის" შუამდგომლობა არ დააკმაყოფილა. ბერდია სიჭინავას თქმით, მათი პარტიის შემთხვევაში დაცული არ არის შესაგებლის მომზადებისთვის რეგლამენტით გათვალისწინებული ვადა, რაც, მისივე განცხადებით, არღვევს პროცედურული სამართლიანობის წესს
