ბელარუსის ადამიანის უფლებათა დაცვის ცენტრის, „ვიასნას“ ინფორმაციით, 2022 წლის თებერვლიდან უკრაინის მხარდაჭერასთან დაკავშირებით ბელარუსში სულ მცირე 419 ადამიანს გამოუტანეს გამამტყუნებელი განაჩენი. მათ შორის 73 ქალია, 142 ადამიანი კი ამჟამად პატიმრობაში იმყოფება.

უფლებადამცველების შეფასებით, დევნის რეალური შემთხვევების რაოდენობა შესაძლოა გაცილებით მეტი იყოს.

ყველაზე მეტი - 222 ადამიანი რუსული სამხედრო ტექნიკის გადაადგილების შესახებ ფოტოებისა და ვიდეოების გადაცემის გამო გაასამართლეს. მათ „ექსტრემისტული საქმიანობის ხელშეწყობას“ ედავებოდნენ.

კიდევ 44 ადამიანს უკრაინის მხარდაჭერასთან დაკავშირებით „სახელმწიფოს ღალატისთვის“ გამოუტანეს განაჩენი, ხოლო უცხო ქვეყნის  17 მოქალაქე ბელარუსში „აგენტურულ საქმიანობაში“ მონაწილეობის ბრალდებით გაასამართლეს.

ტერორიზმის ბრალდებით, მათ შორის რკინიგზაზე დივერსიებთან დაკავშირებულ საქმეებზე, 29 ადამიანი გაასამართლეს. გარდა ამისა, 45 ადამიანს უკრაინის მხარდასაჭერად თანხის გადარიცხვის გამო მიუსაჯეს სასჯელი - გამოძიებამ ეს ქმედებები „ტერორისტული საქმიანობის“ ან „ექსტრემისტული ფორმირებების“ დაფინანსებად შეაფასა.

უკრაინის ომთან დაკავშირებულ ყველაზე მასშტაბურ სისხლის სამართლის საქმეებს შორისაა ე.წ. „ჰაიუნის საქმე“. ის 2025 წლის თებერვალში, მონიტორინგის პროექტ „ბელარუსკი ჰაიუნის“ ბოტის გატეხვის შემდეგ დაიწყო. ამ ბოტის მეშვეობით 2022 წლიდან ბელარუსის მოქალაქეები რუსეთის სამხედრო ტექნიკის გადაადგილების შესახებ ინფორმაციას ავრცელებდნენ. მას შემდეგ, რაც მომხმარებლების პირადი მონაცემები სამართალდამცველების ხელში აღმოჩნდა, ქვეყანაში დაკავებები დაიწყო.

22 ოქტომბრის მონაცემებით, „ჰაიუნის საქმეში“ 141 პირი ფიგურირებს, მათგან 41 პატიმრობაშია.

„ვიასნას“ ცნობით, ბელარუსში ასევე გაასამართლეს 42 ადამიანი უკრაინის მხარეს საბრძოლო მოქმედებებში მონაწილეობის ან ამისთვის მომზადების გამო. საზღვარგარეთ მყოფი ბელარუსი მოხალისეებისა და აქტივისტების წინააღმდეგ კი ომთან დაკავშირებით 37 დაუსწრებელი განაჩენი გამოიტანეს.

უფლებადამცველები აღნიშნავენ, რომ უკრაინის მხარდაჭერის გამო ბელარუსში ადამიანების სისხლისსამართლებრივი დევნა კვლავ გრძელდება.