ე.წ. კრიმინალურ ავტორიტეტებთან დაკავშირებული ბრალდებული ძმების, დავით და გიორგი ფეიქრიშვილების დედის, ნინო აბრამიშვილის ინფორმაციით, ოჯახს მიაწოდეს ცნობა იმის შესახებ, რომ ავთანდილ ბილანიშვილი, იგივე “კაწრო“, თავის სახლთან შენიშნეს.
ნინო აბრამიშვილი ითხოვს დაცვის დანიშვნას, რადგან მიიჩნევს, რომ მთელი ოჯახის სიცოცხლე და და ჯანმრთელობას საფრთხეშია.
"ინფორმაცია მაქვს იმაზე, რომ „კაწრო“ გუშინ "ნახალოვკაში", თავის სახლთან ჩვეულებრივად, ძალიან კარგად დადიოდა.ეს ფაქტი საერთოდ შემზარავია. სურათიც გადაუღიათ, უბრალოდ ჩვენ ვიზღვევთ თავებს, ჩემამდე ვერ მოდის ეს სურათი, თუ მოვიდა, მე არაფრის მეშინია და ეგრევე მივაწვდი მედიასაშუალებებს. რა თქმა უნდა, ეს არის დაუზუსტებელი, რადგან ჯერ ფაქტი არ მაქვს. ასეთ ჭორებს ტყუილად არ იგონებენ. ჩემს შვილს კრიმინალს ეძახიან, მაგრამ ყველაზე დიდი კრიმინალები არიან ციხის უფროსი, ფერაძე, ანუ “ზაუტა”. ზუსტად ვიცი, რომ ფირცხალავა [ციხის უფროსი]იყო ჩემს შვილთან, გოგასთან შესული კამერაში. რა უნდოდა ფირცხალავას ჩემს შვილთან? რა თამაში მიდის ხალხო? გაერკვიეთ, ბატონო პრემიერო, ცუდად არის საქმე ქვეყანაში, სუს-ი არის სათავეში, ხსნით უფროსებს, მაგრამ თვითონ იქ არის კრიმინალური ბანდა. რატომ არავინ მოვიდა და არ მეუბნებიან, არ ინერვიულოთ, თქვენი შვილები დაცულები არიანო? ბატონო ბიძინა, მე არ მეშინია, რომ მომკლავენ, რადგან ჩემი სიკვდილი უარესი იქნება. მესმის, რომ კრიმინალური ბანდა ვამხილე, ესენი არიან სუს-ის წევრები, სუს-ი ყოფილა ყველაზე დიდი ბანდა, მთავრობა ხსნის ერთ უფროსს, მეორეს, მესამეს, მაგრამ შიგნით ერთი და იმავე ხალხია.მე მინდა დაცვა, დაიცვან ჩემი შვილები და ჩემი ოჯახი, რომელიმე მთავრობის წევრმა აიღოს თავზე ეს პასუხისმგებლობა, გვნახოს ოჯახი, რომ ჩვენ ვიყოთ გარანტი, მაგრამ ნუ ეფერებით სუს-ს, ხვალ ის თქვენ მოგადგებათ, თქვენ ოჯახებს ააწიოკებს. სუს-ი არის გასაწმენდი, ეს არის ფაშისტური ორგანიზაცია", - ამბობს აბრამიშვილი. ["ტვ პირევლი"]
