უკრაინის პრეზიდენტმა ვოლოდიმირ ზელენსკიმ და ევროკომისიის პრეზიდენტმა ურსულა ფონ დერ ლაიენმა შაბათს, რომში გამართულ შეხვედრაზე განიხილეს უკრაინის ევროკავშირში გაწევრიანებისკენ გადადგმული ნაბიჯები.
„ძვირფასო პრეზიდენტო ზელენსკი, ევროპა ყოველთვის მხარს დაუჭერს უკრაინას მშვიდობისკენ სწრაფვაში. სამართლიანი და მდგრადი მშვიდობის მისაღწევად, მოლაპარაკებების მაგიდასთან შეგიძლიათ ჩვენი მხარდაჭერის იმედი გქონდეთ....
დღეს ჩვენ ასევე განვიხილეთ ის ნაბიჯები, რომლებსაც უკრაინა დგამს ჩვეის ერების ოჯახში თავისი ადგილის დასამკვიდრებლად“, - დაწერა ფონ დერ ლაიენმა X-ზე.
ზელენსკიმ მოგვიანებით განაცხადა, რომ ფონ დერ ლაიენთან შეხვედრისას განიხილეს „ნაბიჯები, რომლებიც ხელს შეუწყობს უკრაინელების სიცოცხლის დაცვას, უსაფრთხოების აღდგენას და უპირობო ცეცხლის შეწყვეტის შეთანხმებას“.
ზელენსკის ცნობით, შეხვედრაზე ასევე განიხილეს უკრაინასა და ევროკავშირს შორის თანამშრომლობის გაძლიერების საკითხი, კერძოდ, ReArm Europe-ის ინიციატივის მეშვეობით.
„განსაკუთრებული ყურადღება დაეთმო ევროკავშირის სანქციების მე-17 პაკეტის მომზადებას. მნიშვნელოვანია, რომ ის რუსეთის ეკონომიკის ძირითად სექტორებზე იყოს მიმართული და რუსეთზე მშვიდობის აღდგენის მიზნით ზეწოლის ერთ-ერთ ელემენტად იქცეს“, - თქვა ზელენსკიმ.
