აშშ-ის პრეზიდენტმა დონალდ ტრამპმა რუსეთის ლიდერი ვლადიმირ პუტინი გააკრიტიკა უკრაინის მშვიდობიან ქალაქებზე თავდასხმის გამო და განაცხადა, რომ მას არ სურს ომის დასრულება და დრო გაჰყავს.
ტრამპმა ამის შესახებ Truth Social-ში აშშ-ში იტალიიდან დაბრუნების დროს დაწერა, სადაც პაპ ფრანცისკეს დაკრძალვის ცერემონიის დაწყებამდე უკრაინის პრეზიდენტს, ვოლოდიმირ ზელენსკის შეხვდა.
ტრამპმა განაცხადა, რომ პუტინს არ ჰქონდა მიზეზი, ბოლო რამდენიმე დღის განმავლობაში მშვიდობიანი მოსახლეობის, ქალაქების, დაბების მიმართულებით რაკეტები გაესროლა.
„მე უკვე ვფიქრობ, რომ პუტინი, შესაძლოა, ომის გაჩერებას არ აპირებს, უბრალოდ დროს აჭიანურებს. ამას კი სხვანაირად უნდა ვუპასუხოთ, ან საბანკო და საფინანსო, ან მეორადი სანქციებით, ძალიან ბევრი ადამიანი იღუპება!!!" - აღნიშნა ტრამპმა.
აშშ-ის პრეზიდენტმა კიდევ ერთხელ გააკრიტიკა თავისი დემოკრატი წინამორბედები და განაცხადა, რომ მას არაფერი აქვს საერთო „ამ სულელურ ომთან“.
„ეს მძინარე ჯო ბაიდენის ომია და არა ჩემი. ეს პირველივე დღიდან წაგებული ბრძოლა იყო, ეს არ უნდა მომხდარიყო და არც მოხდებოდა, იმ დროს პრეზიდენტი რომ ვყოფილიყავი. უბრალოდ ვცდილობ, გავასუფთავო ის არეულობა, რომელიც ობამამ და ბაიდენმა დამიტოვეს და რა არეულობაა ეს“, - თქვა ტრამპმა.
შეგახსენებთ, უკრაინის პრეზიდენტმა ვოლოდიმირ ზელენსკიმ დონალდ ტრამპთამ შეხვედრის შემდეგ განაცხადა: „დონალდ ტრამპთან შეხვედრას აქვს პოტენციალი გახდეს ისტორიული, თუ საერთო შედეგებს მივაღწევთ“.
