2025 წლის 10 აპრილს რუსეთის საოკუპაციო ძალები თავს დაესხნენ დნიპროპეტროვსკის ოლქს.
უკრაინის პრეზიდენტი ვოლოდიმირ ზელენსკი დნიპროსა და ნიკოპოლზე რუსეთის იერიშებს გამოეხმაურა. მისი თქმით, საჭიროა რუსეთზე ზეწოლის ტაქტიკა, რათა შეჩერდეს ტერორი და ომი.
„რუსეთი აშკარად უგულებელყოფს დიპლომატიას და იყენებს მსოფლიოსთან კონტაქტებს მხოლოდ იმისთვის, რომ გააკეთოს რაიმე სასარგებლო სათავისოდ და არა ომის დასასრულებლად“, - აღნიშნა ზელენსკიმ ვიდეომიმართვისას.
უკრაინის პრეზიდენტის თქმით, უკრაინის მშვიდობიან ქალაქებსა და სოფლებზე ახალი დარტყმები გრძელდება, მიუხედავად იმისა, რომ აშშ-ის წინადადება ცეცხლის სრული შეწყვეტის შესახებ თითქმის ერთი თვის წინ გაკეთდა.
დნიპროზე დარტყმის საუბრისას, ზელენსკიმ აღნიშნა, რომ ამჟამად ადგილზე მუშაობა მიმდინარეობს.
„სავარაუდოდ ეს იყო - ბალისტიკური დარტყმა, სამწუხაროდ, ერთი ადამიანი დაიღუპა - ვუსამძიმრებ ოჯახს და მეგობრებს. ამ დროისთვის ცნობილია, რომ დაშავებულია ხუთი ადამიანი. ყველა იღებს დახმარებას“, - განაცხადა ზელენსკიმ.
ამავდროულად, რუსებმა ნიკოპოლს ხუთი დრონით დაარტყეს.
„ეს არის აბსოლუტურად მიზანმიმართული თავდასხმა ქალაქზე ბაზრის მახლობლად, უბრალოდ მშვიდობიანი მოსახლეობის წინააღმდეგ. დაშავებულია 12 ადამიანი, მათ შორის ერთი ბავშვი", - თქვა უკრაინის პრეზიდენტმა.
მან აღნიშნა, რომ რუსეთის ფედერაცია ურტყამს კიევის, ხარკოვის, დონეცკის, ზაპოროჟიეს და მიკოლაევის რეგიონებს.
მტერი მუდმივად უშვებს მართვად საჰაერო ბომბებს სუმის რეგიონში.
„ჩვენ გავაგრძელებთ მუშაობას ყველა ქვეყანასთან, ყველა ლიდერთან, რომელსაც შეუძლია რეალურად გავლენა მოახდინოს, რათა რუსეთის სახელმწიფომ იგრძნოს ომის მაღალი ფასი - ფასი, რომელიც მუდმივად იზრდება მათთვის“, - ხაზგასმით აღნიშნა ზელენსკიმ.
მან ასევე განაცხადა, რომ უკრაინის სანქციათა პაკეტის მომზადების ბრძანება გასცა.
"ეს არის ძლიერი პაკეტები - როგორც ჩრდილოვან ფლოტზე, რომელსაც მოსკოვი იყენებს ომის დასაფინანსებლად, ასევე ომის პროპაგანდისტებზე - მათ, ვინც რეალურად ცდილობს ჩვენი თავდაცვის შესუსტებას და რუსეთის დახმარებას, ასევე ზოგიერთ ფუნქციონერს - ეს არის ყველა უკრაინელისთვის ცნობილი სახელები, მათ გავლენა ჰქონდათ", - განაცხადა უკრაინის პრეზიდენტმა.
