კრივი რიჰზე რუსეთის თავდასხმის შედეგად 9 ბავშვი დაიღუპა. უკრაინის პრეზიდენტმა ვოლოდიმირ ზელენსკიმ მათი სახელები ტელეგრამის არხზე დაწერა.
„სამი წლის ტიმოფეი, სამწუხაროდ, დღეს საავადმყოფოში გარდაიცვალა, 7 წლის რადისლავი, არინა, რომელიც ასევე სამუდამოდ 7 წლისაა. 9 წლის ჰერმანი, 15 წლის დანიელი. თხუთმეტი წლის ნიკიტა. თხუთმეტი წლის ალინა. კონსტანტინი, რომელიც მუდამ 16 წლისაა, 17 წლის ნიკიტა. ეს ის ბავშვები არიან, რომლებიც კრივი რიჰზე რუსული ბალისტიკური რაკეტის იერიშის შედეგად დაიღუპნენ. ეს მოხდა ტაგანროგის ტერიტორიიდან, მტრის ტერიტორიიდან გაშვებიდან რამდენიმე წუთის შემდეგ “, - წერს ზელენსკი.
მან დასძინა, რომ რუსული დარტყმის შედეგად ცხრა ზრდასრული ადამიანი დაიღუპა. კიდევ 62 ადამიანი, რომელთაგან 12 ბავშვი იყო, დაშავდა სარაკეტო თავდასხმის შედეგად. ახლა ექიმები ყველაფერს აკეთებენ ამ ადამიანების სიცოცხლის გადასარჩენად.
„რაკეტა პირდაპირ ქუჩაში ჩავარდა - ირგვლივ არის ჩვეულებრივი სახლები, სათამაშო მოედანი, მაღაზიები, რესტორანი. ამ ბალისტიკური რაკეტის გარდა, რუსებმა გუშინ გამოიყენეს თავდასხმის დრონები კრივი რიჰის წინააღმდეგ - უბრალოდ სამაშველო ოპერაციის დროს, ხალხის ამ მწუხარების დროს.
დრონებით დარტყმის შედეგად 7 ადამიანი დაშავდა, ერთი დაიღუპა. უბრალოდ, არ არსებობს უფრო ღრმა ცინიზმი, ბოროტება და ხალხის სიძულვილი, ვიდრე ის, რასაც ახლა რუსეთი წარმოადგენს“, - თქვა ზელენსკიმ.
უკრაინის პრეზიდენტმა მადლობა გადაუხადა პარტნიორ ქვეყნებს, რომლებიც გამოეხმაურნენ რუსეთის თავდასხმას.
ამასთან, მან აღნიშნა, რომ „უსიამოვნოდ გაკვირვებულია“ აშშ-ის საელჩოს რეაქციის გამო. „სამწუხაროდ, არასასიამოვნოდ გასაკვირია ამერიკის საელჩოს რეაქცია: ასეთი ძლიერი ქვეყანა, ასეთი ძლიერი ხალხი - და ასეთი სუსტი რეაქცია. მათ ეშინიათ სიტყვა "რუსულის" თქმისაც კი, როდესაც საუბრობენ რაკეტაზე, რომელმაც ბავშვები დახოცა", - დაწერა ზელენსკიმ.
4 აპრილს, საღამოს რუსეთის ძალებმა კრივი რიჰზე, საბავშვო მოედანთან ახლოს ბალისტიკური რაკეტით იერიში მიიტანეს, დაიღუპა 18 ადამიანი, მათ შორის 9 ბავშვი.ამის შემდეგ ოკუპანტებმა ქაკაქის წინააღმდეგ კიდვ ერტი დარტყმა განახორციელეს, ამჯერად დრონებით, რომელსაც ერთი ადამიანი ემსხვერპლა.
თავდასხმის შემდეგ, უკრაინაში აშშ-ის ელჩმა ბრიჯიტ ბრინკმა X-ზე დაწერა, რომ იგი "შოკირებულია" და აღნიშნა, რომ ეს არის "მიზეზი, რის გამოც ომი უნდა დასრულდეს". ბრინკმა პოსტში რუსეთი არც უხსენებია.
