აშშ-ის სენატში წარადგინეს კანონპროექტი, რომელიც რუსეთზე სანქციების დაწესებას გულისხმობს იმ შემთხვევაში, თუ კრემლი უარს იტყვის უკრაინაში სამშვიდობო მოლაპარაკებებში ჩართავზე. მათ შორის არის 500%-იანი ტარიფები ქვეყნებზე, რომლებიც ყიდულობენ რუსულ ნავთობს და გაზს. იუწყება Reuters
კანონპროექტი რესპუბლიკელმა ლინდსი გრემმა და დემოკრატმა რიჩარდ ბლუმენტალმა წარადგინეს. კანონპროექტის 50 თანასპონსორი მოიცავს რესპუბლიკელებისა და დემოკრატების თანაბარ რაოდენობას, რაც მიუთითებს ინიციატივის ფართო ორპარტიულ მხარდაჭერაზე.
„ამერიკის შეერთებული შტატების სენატში დომინანტური შეხედულებაა, რომ რუსეთი აგრესორია და რომ პუტინის საშინელი ომი და აგრესია უნდა დასრულდეს ახლა და შეკავებულ იქნას მომავალში “, - ნათქვამია სენატორების ერთობლივ განცხადებაში.
კანონპროექტი ითვალისწინებს როგორც პირველად, ისე მეორად სანქციებს რუსეთისა და იმ პირების მიმართ, რომლებიც მხარს უჭერენ კრემლის აგრესიას უკრაინაში.
სანქციები ამოქმედდება, თუ სამშვიდობო მოლაპარაკებები ჩაიშლება ან შეთანხმება მიღწეულია, მაგრამ რუსეთი მას დაარღვევს.
კანონპროექტით გათვალისწინებულ სანქციებს შორის არის 500%-იანი გადასახადი იმ ქვეყნების მიმართ, რომლებიც რუსულ ნავთობს, გაზს, ურანს და სხვა რესურსებს ყიდულობენ.
„ჩვენ ვიმედოვნებთ, რომ 2025 წელს პრეზიდენტი ტრამპი და მისი გუნდი მიაღწევენ იმას, რასაც მსოფლიომ წარსულში ვერ მიაღწია: სამუდამოდ დაასრულოს რუსული აგრესია უკრაინის წინააღმდეგ და უზრუნველყოს თავისუფალი და დემოკრატიული უკრაინის შენარჩუნება“, - აღნიშნულია სენატორების განცხადებაში.
რუსეთის წინააღმდეგ ეს სანქციები მზად არის და მიიღებს ორპარტიულ და ორპალატიან მხარდაჭერას, თუ სენატსა და წარმომადგენელთა პალატაში კენჭისყრაზე გავა.
