უკრაინის პრეზიდენტი ვოლოდიმირ ზელენსკი ელის, რომ შეერთებული შტატები მალე გაამკაცრებს სანქციებს რუსეთის წინააღმდეგ „ენერგეტიკული ცეცხლის შეწყვეტის“ დარღვევის გამო.
ამის შესახებ მან კიევში გერმანიის საგარეო საქმეთა მინისტრ ანალენა ბერბოკთან ერთობლივ პრესკონფერენციაზე განაცხადა.
ზელენსკის თქმით, საუდის არაბეთში შეთანხმებების კონტექსტში ენერგეტიკულ ობიექტებზე თავდასხმების შეჩერების თაობაზე სანქციების გავლენის გაზრდას მოელის
„იმიტომ, რომ ვფიქრობ, რუსები არღვევენ იმას, რაც ამერიკას დაპირდნენ – ყოველ შემთხვევაში, რაც ამერიკამ საჯაროდ გვითხრა.
ჩვენ დიდი იმედი გვაქვს, რომ პრეზიდენტ ტრამპს აქვს ყველა შესაბამისი ინსტრუმენტი, რათა გაზარდოს სანქციების ზეწოლა რუსულ მხარეზე“, - დასძინა მან.
უკრაინის პრეზიდენტმა აღნიშნა, რომ უკრაინა შეერთებულ შტატებს სხვადასხვა დონეზე გადასცემს ინფორმაციას ენერგეიკულ ობიექტებზე დარტყმების შეჩერებასთან დაკავშირებით რუსეთის მიერ შეთანხმების დარღვევის შესახებ. „და ჩვენ ვხედავთ, რომ ამერიკა ნელ-ნელა იწყებს ამის გაგებას“, - თქვა ზელენსკიმ.
„ძალიან გვინდა, რომ ეს არ იყოს მხოლოდ ჩვენს მხარეებს შორის კომუნიკაცია. ჩვენ ნამდვილად გვინდა ვიხილოთ რამდენიმე ძლიერი ნაბიჯი. ჩვენთვის სიტყვები არ არის საკმარისი - მთელი პატივისცემით ჩვენი სტრატეგიული პარტნიორების მიმართ. სანქციები ჩვენთვის ძალიან მნიშვნელოვანია“, - აღნიშნა ზელენსკიმ.
