უკრაინა აშშ-სთან სასარგებლო წიაღისეულზე შეთანხმების ტექსტთან დაკავშირებით კონსულტაციებს უკვე აწარმოებს. უკრაინის საგარეო საქმეთა მინისტრმა ანდრიი სიბიჰამ 1 აპრილს გამართულ ბრიფინგზე დაადასტურა, რომ მისმა უწყებამ 28 მარტს ამერიკული მხრიდან სასარგებლო წიაღისეულზე შეთანხმების ახალი ტექსტი მიიღო.
მისი თქმით, აშშ-სთან ამ დოკუმენტის ტექსტზე ერთი საკონსულტაციო რაუნდი უკვე ჩატარდა.
„საგარეო საქმეთა სამინისტრომ 28 მარტს დიპლომატიური არხებით ამერიკული მხარისგან მიიღო მინერალების შესახებ შეთანხმების ახალი პროექტი. ცნობილია, რომ უკრაინა მზად იყო, ხელი მოეწერა მანამდე შემუშავებულ ჩარჩოშეთანხმებაზე. ასევე ვადასტურებ, რომ ჩვენ უკვე დაწყებული გვაქვს კონსულტაციები შეერთებულ შტატებთან შეთანხმების ტექსტზე. ამ კონსულტაციების ერთი რაუნდი უკვე გაიმართა. უკრაინული მხარე მოწოდებულია, მიაღწიოს დოკუმენტს, რომელიც დააკმაყოფილებს როგორც შეერთებული შტატების, ისე უკრაინის ინტერესებს“, – თქვა ანდრიი სიბიჰამ.
როგორც უკრაინის საგარეო საქმეთა მინისტრმა აღნიშნა, უკრაინაში ძლიერი ამერიკული ბიზნესი ხელს შეუწყობს ქვეყნის უსაფრთხოების ინფრასტრუქტურას.
„გვჯერა, რომ შეთანხმების ტექსტი, რომელიც უზრუნველყოფს ამერიკული ბიზნესის წარმომადგენლობის გაძლიერებას, ასევე წვლილს შეიტანს უკრაინის უსაფრთხოების ინფრასტრუქტურაში. ყოველთვის მნიშვნელოვანია უკრაინაში ამერიკული ბიზნესის წარმომადგენლობის გაძლიერება. შესაბამისად, ეს პროცესი გაგრძელდება და ჩვენ ვიმუშავებთ ამერიკულ კოლეგებთან ორმხრივად მისაღები ტექსტის მისაღწევად“, – თქვა სიბიჰამ.
