მარტის მდგომარეობით, უკარინის პრეზიდენტ ვოლოდიმირ ზელენსკის უკრაინელების 69% ენდობა. უკრაინული მედიის ცნობით, ამას მოწმობს კიევის სოციოლოგიის საერთაშორისო ინსტიტუტის გამოკითხვა, რომელიც 12-22 მარტს ჩატარდა.
„2025 წლის მარტის მეორე ნახევრის მონაცემებით, უკრაინელების 69% ენდობა პრეზიდენტ ვოლოდიმირ ზელენსკის, 28% არ ენდობა. ნდობისა და უნდობლობის ბალანსი +41%-ია“, - აღნიშნულია კვლევაში.
სოციოლოგები აღნიშნავენ, რომ 14 თებერვლიდან 4 მარტის ჩათვლით ჩატარებულ კვლევასთან შედარებით, ცვლილებები სტატისტიკური ცდომილების ფარგლებში რჩება.
პრეზიდენტისადმი ნდობისა და უნდობლობის ბალანსი დადებითია უკრაინის ყველა რეგიონში.
ინსტიტუტის აღმასრულებელი დირექტორის მოადგილემ ანტონ გრუშეცკიმ აღნიშნა, რომ მიუხედავად იმისა, რომ უკრაინელებს დაუგროვდათ კითხვები მთავრობის მიმართ და გამართლებული კრიტიკა ინდივიდუალური ქმედებებისა და გადაწყვეტილებების მიმართ, მათი ნდობა ზელენსკის მიმართ საკმაოდ მაღალია, თავად ის კი აღიქმება, როგორც სახელმწიფოს ლეგიტიმური მეთაური.
კვლევა ჩატარდა 12-დან 22 მარტამდე. მობილური ნომრების შემთხვევითი შერჩევის საფუძველზე. სატელეფონო ინტერვიუების გამოყენებით გამოიკითხა 18 წლის და უფროსი ასაკის 1326 რესპონდენტი, რომლებიც ცხოვრობენ უკრაინის მთავრობის მიერ კონტროლირებად ტერიტორიაზე.
გამოკითხვა არ მოიცავდა იმ ტერიტორიების მაცხოვრებლებს, რომლებსაც დროებით ვერ აკონტროლებს უკრაინის ხელისუფლება. ასევე, გამოკითხვა არ ჩატარებულა იმ მოქალაქეებთან, ვინც საზღვარგარეთ 2022 წლის 24 თებერვლის შემდეგ გაემგზავრა.
