აშშ-ის პრეზიდენტის სპეციალური წარმომადგენელი რუსეთსა და უკრაინაში, კიტ კელოგი აცხადებს, რომ უკრაინა დამოუკიდებლად მიიღებს გადაწყვეტილებას მომავალ „სამშვიდობო შეთანხმებასთან“ დაკავშირებით.
ამის შესახებ კელოგმა ბრიუსელში, ნატო-ს შტაბ-ბინაში გამართული მოლაპარკების შემდეგ ჟურნალისტებს განუცხადა.
კელოგმა თქვა, რომ აშშ-ის ოფიციალური პირები პარალელურად ცდილობენ მოსკოვისა და კიევის მოლაპარაკების მაგიდასთან მიყვანას, მაგრამ საბოლოო ჯამში სწორედ კიევი გადაწყვეტს, მიიღებს თუ არა უკრაინა აშშ-ის მიერ შეთავაზებულ ნებისმიერ შეთანხმებას.
"უკრაინელების გადაწყვეტილება არის უკრაინის გადაწყვეტილება. ზელენსკი არის არჩეული ლიდერი სუვერენული ერისა და ეს გადაწყვეტილებები მისი გადაწყვეტილებაა და არავინ მოახვევს თავს სუვერენული ერის არჩეულ ლიდერს", - დასძინა კელოგმა.
ტრამპის წარმომადგენელმა ხაზგასმით აღნიშნა, რომ მისი ამოცანაა ხელი შეუწყოს შეთანხმებას, რომელიც უზრუნველყოფს საიმედო უსაფრთხოების გარანტიებს.
ამავდროულად, კელოგი მიიჩნევს, რომ რუსეთიც და უკრაინაც მზად არიან შეაჩერონ საომარი მოქმედებები, რადგან ვერც ერთი მხარე ვერ მიაღწევს გადამწყვეტ გამარჯვებას ბრძოლის ველზე.
"ახლა, როგორც ჩანს, ორივე მხარეს სურს "თამაშიდან გასვლა", - განუცხადა მან ჟურნალისტებს.
დონალდ ტრამპის ადმინისტრაციამ გასულ კვირას გააძლიერა ძალისხმევა რუსეთსა და უკრაინას შორის მოლაპარაკებების პროცესის დასაწყებად მოსკოვის მიერ გაჩაღებული სრულმასშტაბიანი ომის დასასრულებლად.
