31 დეკემბერს რუსეთის შეიარაღებულმა ძალებმა უკრაინის ტერიტორიაზე მასირებული სარაკეტო იერიში მიიტანა.
სარაკეტო თავდასხმის საფრთხის გამო, განგაში გამოცხადდა მთელი ქვეყნის მასშტაბით.
მონიტორინგის პორტალების ინფორმაციით, სულ მცირე ექვსმა რუსულმა თვითმფრინავმა ТУ-22М3-მა უკრაინის მიმართულებით Х-22 ტიპის 22 რაკეტის გაშვება განახორციელა.
ამასთან, სავასლეიკას აეროდომიდან აფრინდა МиГ-31К-ტიპის გამანადგურებელი თვითმფრინავი, რომელსაც "კინჟალის" რაკეტის გასროლა შეუძლია.
კიევის რეგიონალურმა სამხედრო ადმინისტრაციამ განაცხადა, რომ დედაქალაქზე სარაკეტო თავდასხმა მოხდა, თუმცა ქალაქის თავზე საჰაერო თავდაცვა მოქმედებდა.
მათივე ინფორმაციით, საჰაერო თავდაცვის ძალების მიერ მოგერიებული ერთ-ერთი რუსული რაკეტის ნამსხვრევებმა დააზიანა კერძო სახლი.
უკრაინის საჰაერო ძალების ცნობით, რაკეტები და დრონები გამოჩნდენ კიევის, სუმის, პოლტავის, ჩერნიჰივის, დნეპროპეტროვსკის, ხარკოვისა და ჩერკასის რეგიონებში.
წინასწარი მონაცემებით, სუმის რაიონის ქალაქ შოსტკაში, რუსული თავდასხმის შედეგად დაზიანდა 12 მრავალსართულიანი საცხოვრებელი კორპუსი, ორი სასწავლო დაწესებულება, განადგურდა გარკვეული ინფრასტრუქტურული ობიექტები.
ერთი კვირით ადრე, 25 დეკემბერს, შობის დღეს, რუსეთის ჯარებმა ასევე დაიწყეს მასიური შეტევა უკრაინის ქალაქებზე, გაისროლეს 70-ზე მეტი ბალისტიკური რაკეტა და გამოიყენეს 100 თავდასხმის დრონი. თავდასხმის სამიზნე იყო უკრაინის ენერგეტიკული ობიექტები.
