ბულგარეთში 1-ელ ნოემბერს ჩატარებული საპრეზიდენტო არჩევნების მეორე ტურში მოქმედმა პრეზიდენტმა ილიანა იოტოვამ გაიმარჯვა. ცენტრალური საარჩევნო კომისიის წინასწარი მონაცემებით, ხმების დათვლის პროცესში ის ყოფილ პრემიერ-მინისტრს, ანდრეი გიუროვს, მნიშვნელოვანი უპირატესობით უსწრებს.
მეორე ტურში იოტოვა და მისი ვიცე-პრეზიდენტობის კანდიდატი კირილ ვალჩევი მონაწილეობდნენ, მათ კონკურენციას კი ანდრეი გიუროვი და გიორგი კანდევი უწევდნენ.
ცენტრალური საარჩევნო კომისიის წინასწარი მონაცემებით, ხმების 98.43%-ის დათვლის შემდეგ, ილიანა იოტოვასა და მის ვიცე-პრეზიდენტობის კანდიდატ კირილ ვალჩევს ხმების 57.64% აქვთ, ხოლო ანდრეი გიუროვისა და მისი ვიცე-პრეზიდენტობის კანდიდატის, გიორგი კანდევის წყვილს - 39.40%.
გიუროვმა დამარცხება აღიარა და განაცხადა, რომ შედეგებს იღებს, მიუხედავად იმისა, რომ სხვაობის მასშტაბი მისთვის მოულოდნელი აღმოჩნდა.
62 წლის ილიანა იოტოვა, რომელიც პრეზიდენტის მოვალეობას იანვრიდან ასრულებს, პრემიერ-მინისტრ რუმენ რადევის პარტია „პროგრესული ბულგარეთის“ მხარდაჭერით მონაწილეობდა არჩევნებში. მისი მთავარი მეტოქე, ყოფილი პრემიერ-მინისტრი ანდრეი გიუროვი, პროდასავლური ოპოზიციური ძალების მხარდაჭერით სარგებლობდა.
საარჩევნო კამპანიის ერთ-ერთი მთავარი თემა უკრაინაში რუსეთის ომი იყო. იოტოვა კონფლიქტის დიპლომატიური გზით მოგვარებას ემხრობა და უკრაინისთვის სამხედრო დახმარების გაგრძელებას ეწინააღმდეგება. გიუროვი კი უკრაინის მხარდაჭერას და დასავლელ პარტნიორებთან, მათ შორის ნატო-სა და ევროკავშირთან, უფრო მჭიდრო თანამშრომლობას უჭერს მხარს.
ბულგარეთის პრეზიდენტის უფლებამოსილებები ძირითადად ცერემონიული ხასიათისაა, თუმცა მას შეუძლია კანონებზე ვეტოს დადება, შეიარაღებული ძალების მთავარსარდლობა და საერთაშორისო ხელშეკრულებების ხელმოწერა. პრეზიდენტს ხუთი წლის ვადით ირჩევენ.
