ბელარუსი აზერბაიჯანს აწვდიდა თანამედროვე იარაღს, იმის მიუხედავად, რომ მინსკი და ერევანი მოკავშირეები და კოლექტიური უსაფრთხოების ორგანიზაციის წევრები იყვნენ.
ამის შესახებ გამოცემა Politico დოკუმენტებზე დაყრდნობით იუწყება.
გამოცემის ცმობით, დოკუმენტები ახალ შუქს ჰფენს სომხეთის გადაწყვეტილებას ამ კვირაში გამოაცხადოს თავისი განზრახვა კოლექტიური უსაფრთხოების ხელშეკრულების ორგანიზაციიდან გასვლის შესახებ.
დოკუმენტების პაკეტი, რომელიც შედგება ათობით წერილისგან, დიპლომატიური ნოტისგან, აჩვენებს, რომ ბელარუსი აქტიურად ეხმარებოდა აზერბაიჯანის შეიარაღებულ ძალებს 2018-2022 წლებში, როდესაც სომხეთთან დაძაბულობამ პიკს მიაღწია.
ბაქოსთვის შეთავაზებული დახმარება მოიცავდა ძველი საარტილერიო ტექნიკის მოდერნიზაციას და ახალი სამხედრო აღჭურვილობის მიწოდებას.
დოკუმენტებში შედის ბელარუსის იარაღის ექსპორტის სახელმწიფო სააგენტოს წერილები საკუთარი სამხედრო-სამრეწველო ფირმებისთვის აზერბაიჯანისთვის თანამედროვე საარტილერიო აღჭურვილობის შეკვეთების შესახებ, ასევე ორ სახელმწიფოს შორის მიმოწერა აზერბაიჯანის შეიარაღებული ძალებისთვის დრონების წინააღმდეგ ბრძოლის სადგურების შესყიდვის შესახებ.
გამოცემის მიერ შესწავლილ ერთ-ერთ დიპლომატიურ გზავნილში ნათქვამია, რომ ბელარუსული საწარმოები აქტიურ როლს ასრულებენ „აზერბაიჯანის დეოკუპირებული ტერიტორიების აღდგენაში, ასევე ბელარუსული საქონლისა და მომსახურების ექსპორტში“.
2022 წლის სექტემბერში მთიან ყარაბაღში დაიწყო საომარი მოქმედებები აზერბაიჯანიის ძალებმა დაიკავეს ძირითადი სტრატეგიული სიმაღლეები.
მაშინ სომხეთმა მიმართა კოლექტიური უსაფრთხოების ხელშეკრულების ორგანიზაციას დახმარებისთვის, მაგრამ მოგვიანებით ბლოკი დაადანაშაულა ნაკისრი ვალდებულებების შეუსრულებლობაში.
იმის მიუხედავად, რომ ქაღალდზე ალექსანდრ ლუკაშენკა სომხეთის მოკავშირეა, მან აზერბაიჯანის პრეზიდენტს ილჰამ ალიევს "ჩვენი კაცი" უწოდა და თქვა, რომ არასწორი იქნებოდა უსაფრთხოების ხელშეკრულების ორგანიზაციას მისთვის წინააღმდეგობა გაეწია.
შეგახსენებთ, გუშინ, 13 ივნისს, ცნობილი გახდა, რომ სომხეთის რესპუბლიკის ელჩი ბელარუსში რაზმიკ ხუმარიანი ერევანში კონსულტაციებისთვის გაიწვიეს.
მანამდე ნიკოლ ფაშინიანმა განაცხადა, რომ არც ის და სომხეთის რესპუბლიკის არც სხვა ოფიციალური წარმომადგენელი ბელარუსში არ ჩავა, ვიდრე ალექსანდრ ლუკაშენკა მისი პრეზიდენტი იქნება.
აღნიშნული გადაწყვეტილების მიზეზად ფაშინიანმა დაასახელა ლუკაშენკას ბოლო განცხადება ერევანსა და ბაქოს შორის სამხედრო კონფლიქტის შესახებ, რომლის შედეგადაც აზერბაიჯანმა მთიან ყარაბაღზე კონტროლი დაიბრუნა.
ამასთან, გუშინ ნიკოლ ფაშინიანმა თქვა, რომ სომხეთი დატოვებს კოლექტიური უსაფრთხოების ხელშეკრულების ორგანიზაციას.
