კახეთში, არასრულწლოვანის გაუპატიურებაში ბრალდებული სიძის დაჭრის ფაქტზე დაკავებულს სასამართლომ აღკვეთი ღონისძიების სახით პატიმრობა შეუფარდა. გამოძიება დაკავებულს განზრახ მკვლელობის მცდელობას ედავება.
პროცესზე დაცვის მხარე 20 ათას ლარიანი გირაოს ითხოვდა, თუმცა მოსამართლემ სრულად გაიზიარა პროკურატურის შუამდგომლობა და მას პატიმრობა შეუფარდა.
ადვოკატების თქმით, სასამართლოს სხდომაზე საქმე გადაკვალიფიცირდა და ბრალდება დამძიმდა. თავდაპირველად გამოძიება დაიწყო სისხლის სამართლის კოდექსის 117-ე ჯანმრთელობის განზრახ მძიმე დაზიანების მუხლით, ახლა კი მიმდინარეობს 19-108-ე განზრახ მკვლელობის მცდელობის მუხლით.
საქმეზე წინასასამართლო სხდომა 12 მარტს, 12:00 საათზე გაიმართება.
14 წლის გოგო კახეთის ერთ-ერთ მუნიციპალიტეტში მამიდის ქმარმა გააუპატიურა. მას შემდეგ, რაც არასრულწლოვნის ბიძამ - მამის ძმამ, მომხდარის შესახებ შეიტყო, მოძალადე კაცი ცივი იარაღით დაჭრა. დაჭრილი საავადმყოფოში გადაიყვანეს. ექიმების თქმით, მისი მდგომარეობა კრიტიკულად მძიმეა.
მოზარდის გაუპატიურებაში ბრალდებულ კაცს, გამოძიება მას სისხლის სამართლის კოდექსის, 137-ე მუხლით ჩადენილ დანაშაულს ედავება, რაც გაუპატიურებას გულისხმობს.