დიდუბე-ავჭალის გადასარბენზე, ქსნის ქუჩის მიმდებარედ, ლიანდაგზე დღეს გამთენიისას ფერდობიდან ქვის მასა ჩამოიშალა. მომხდარი ფაქტის შედეგად, დროებით შეფერხდა ბათუმი-თბილისის, თბილისი-ბორჯომის და თბილისი-ბათუმის მატარებლების მოძრაობა.
აღნიშნულის შესახებ განცხადებას საქართველოს რკინიგზა ავრცელებს.
როგორც განცხადებაშია აღნიშნული, საქართველოს რკინიგზის შესაბამისი სამსახურების მიერ ერთი ლიანდაგი ოპერატიულად გაიწმინდა და დროულად მოხერხდა მატარებლების მოძრაობის განახლება. ამ ეტაპზე მიმდინარეობს მეორე მიმართულების ლიანდაგის გაწმენდითი სამუშაოები.
„სამუშაოების დასრულებისთანავე მეორე ლიანდაგზეც უსაფრთხოების ყველა წესის გათვალისწინებით, მოძრაობა ჩვეულ რეჟიმში განახლდება. პარალელურად, მიმდინარეობს ქვათაცვენის ადგილმდებარეობის დათვალიერება და შესაბამისი სპეციალისტების მიერ შესწავლა“, – ნათქვამია განცხადებაში.
