დღეს, 17 დეკემბერს, საქართველოს ეროვნულ ბანკში ახალი საგადახდო სისტემის პროექტის "დროის რეალურ რეჟიმში ანგარიშსწორებისა" (RTGS) და "ფასიანი ქაღალდების ანგარიშსწორების" სისტემების პრეზენტაცია გაიმართა.
პრეზენტაციას ამერიკის შეერთებული შტატების საგანგებო და სრულუფლებიანი ელჩი საქართველოში ჯონ ბასი, მონტრანის კორპორაციის ვიცე-პრეზიდენტი ჩარლზ ვოლში, ბლუმბერგის უფროსი მრჩეველი დსთ-სა და საქართველოში ჯონი პენგი, ამერიკის ხაზინიდან, ეროვნული ბანკის მრჩეველი დევიდ ქალფეფერი, საბანკო ასოციაციისა და საქართველოში მოქმედი კომერციული ბანკების წარმომადგენლები ესწრებოდნენ.
ღონისძიება ეროვნული ბანკის პრეზიდენტმა გიორგი ქადაგიძემ გახსნა.
"ჩვენ გასული წლის მაისში ამერიკის შეერთებული შტატების ელჩთან ერთად მოვაწერეთ ხელი საგრანტო ხელშეკრულებას, რომლის საფუძველზედაც ეროვნულმა ბანკმა ამერიკის შეერთებული შტატების საერთაშორისო განვითარების სააგენტოსგან რამდენიმე სისტემის დანერგვისთვის მიიღო დაფინანსება. ერთი წლის წინ ყველას ზედმეტად ამბიციური და ოპტიმისტური ეჩვენებოდა ჩვენი გეგმა - ერთდროულად დაგვეწყო მუშაობა ასეთი მასშტაბის პროექტებზე და რადიკალურად შეგვეცვალა ანგარიშსწორებისა და საგადახდო სისტემები. შედეგი სახეზეა, დღეს ეს სისტემა ოფიციალურად ამოქმედდა, გადავედით მართვის კიდევ უფრო თანამედროვე, მაღალტექნოლოგიურ მოდელზე, ოპერაციების მართვა გახდა სწრაფი და ურისკო - რაც ნიშნავს რომ უფრო უსაფრთხოდ და საიმედოდაა დაცული ჩვენი ფულის მოძრაობა. გარდა ამისა, დღეიდან ფასიანი ქაღალდებით ვაჭრობასთან დაკავშირებული ნებისმიერი ოპერაცია ქაღალდის დოკუმენტების ბრუნვის ნაცვლად განხორციელდება ელექტრონულად, რამდენიმე წუთში. მთლიანობაში სისტემა უზრუნველყოფს ბანკთაშორისი გადარიცხვების სწრაფ, უსაფრთხო და უწყვეტ დამუშავებას - რაც საბოლოო ჯამში საბანკო სექტორის უშუალო მომხმარებლის, მოქალაქეებისათვის ეფექტური და გამართული მომსახურების მიწოდებაზე აისახება", - განაცხადა ქადაგიძემ.
აღნიშნული პროექტის განხორცილება საქართველოს ეროვნულმა ბანკმა 2007 წელს ამერიკის შეერთებული შტატების საერთაშორისო განვითარების სააგენტოს (UშAID) - მხარდაჭერით დაიწო. პროექტს მსოფლიოში ცნობილი ამერიკული კომპანია მონტრანი ახორცილებს, რომელიც სპეციალიზებულია თანამედროვე საგადახდო სისტემების დანერგვაში. მონტრანმა მსოფლიოს 27 ქვეყნის ცენტრალურ ბანკში უკვე განახორციელა მსგავსი პროექტები. ეს ქვეყნებია ისრაელი, რუმინეთი, ბულგარეთი, ირანი და ა. შ. დროის რეალურ რეჟიმში ანგარიშსწორების სისტემა (ღთGშ) არის საგადახდო სისტემა, სადაც გადარიცხვების დამუშავება და ანგარიშსწორება თანმიმდევრულად, უწყვეტად, რეალურ დროში ხორციელდება. ახალი ღთGშ სისტემა მომხმარებელს გადახდების უწყვეტ რეჟიმში დამუშავების შესაძლებლობებს აძლევს.
"საქართველოს ეროვნულ ბანკში ახალი საგადახდო და ფასიანი ქაღალდების ანგარიშსწორების სისტემების ამოქმედება ძალზედ მნიშვნელოვანი ფაქტია, რომელიც ხელს შეუწყობს საქართველოს ფინანსური უსაფრთხოების უფრო მეტად განმტკიცებას და ქვეყნის ინტეგრაციას საერთაშორისო ეკონომიკურ ბაზაში. ჩვენ მოხარულები ვართ რომ გვაქვს შესაძლებლობა დახმარება გავუწიოთ საქართველოს, მისი როგორც ქვეყნის ინტეგრაციას დასავლეთის ეკონომიკასა და საფინანსო ბაზრებთან", - განაცხადა ამერიკის შეერთებული შტატების ელჩმა საქართველოში ჯონ ბასმა დღევანდელ ღონისძიებაზე.