ამერიკის შეერთებული შტატები უკრაინას 300 მლნ დოლარის ღირებულების სამედრო დახმარების ახალ პაკეტს გამოუყოფს. ამის შესახებ პენტაგონში განაცხადეს.
სამხედრო დახმარების ახალი პაკეტი მოიცავს საჰაერო თავდაცვის დამატებით საშუალებებს, არტილერიას, ანტისარაკეტო საშუალებებსა და საბრძოლო მასალას.
კონკრეტულად საუბარია დამატებით საბრძოლო მასალაზე Patriot-ის ტიპის საჰაერო თავდაცვის სისტემებისთვის, რაკეტებს საჰაერო თავდაცვისთვის, Avenger-ის ტიპის საჰაერო თავდაცვის სისტემებს, Stinger-ის ტიპის საზენიტო კომპლექსებს, მაღალი სიზუსტის საავიაციო საბრძოლო მასალას, Zuni-ის ტიპის საავიაციო რაკეტებს უპილოტო საავიაციო სისტემებისთვის.
ასევე სამხედრო დახმარების პაკეტში შედის АТ-4 ტიპის ანტისატანკო კომპლექსები, დამატებითი საბრძოლო მასალები HIMARS -ის საარტილერიო სარაკეტო სისტემებისთვის, 155 მმ-იანი და 105 მმ-იანი საარტილერიო ჭურვები, 105 მმ-იანი სატანკო საბრძოლო მასალა, 30 მილიონზე მეტი საბრძოლო მასალა შაშხანებისთვის, განაღმვისთვის აღჭურვილობა და სისტემები, ასაფეთქებელი საბრძოლო მასალა ტერიტორიების განაღმვისთვის, ღამის ხედვის მოწყობილობები, სათადარიგო ნაწილები, გენერატორები და სხვა საველე აღჭურვილობა.
პენტაგონში აღნიშნავენ, რომ აშშ გააგრძელებს მუშაობას მოკავშირეებთან და პარტნიორებთან უკრაინისთვის დახმარებას.
მანამდე, მაისში აშშ-ის თავდაცვის დეპარტამენტმა განაცხადა, რომ უკრაინას 375 მილიონამდე დოლარი გამოუყო კრიტიკული საჭიროებებისთვის.
საერთო ჯამში სრულმასშტაბიანი ომის დაწყებიდან აშშ-მა უკრაინას 37,6 მლრდ დოლარის ღირებულების სამხედრო დახმარება გამოუყო.
