ევროკავშირის საგარეო საქმეთა და უსაფრთხოების პოლიტიკის უმაღლესი წარმომადგენელის პრესსპიკერი, ნაბილა მასრალი აცხადებს, რომ რუსეთის მხრიდან ბოლო პერიოდში მომხდარი თავდასხმები დნიპროსა და კიევზე დაუსჯელი არ დარჩება. მისი თქმით, რუსეთის ხელისუფლება პასუხს აგებს მშვიდობიანი მოქალაქეების მიმართ ტერორისთვის.
„რუსეთის ბარბაროსული თავდასხმა გრძელდება, ის კლავს და ატერორებს მშვიდობიან მოსახლეობას. თავდასხმა საავადმყოფოზე დნიპროში, ახლა კიევი გამთენიისას, კიევის დღეს. რუსეთის ხელისუფლება და დამნაშავეები პაუხს აგებენ“, - დაწერა ნაბილა მასრალიმ Twitter-ში და აღნიშნა, რომ ევროკავშირი კვლავ მზად არის დაეხმაროს უკრაინას თავისუფლებისათვის ბრძოლაში.
დნიპროზე შეტევა 26 მაისს მოხდა. სამედიცინო დაწესებულებაზე თავდასხმის შედეგად დაღუპულთა რაოდენობა ოთხამდე გაიზარდა. კიევის წინააღმდეგ კი მასირებული იერიში რუსეთის ძალებმა გასულ ღამეს მიიტანეს, დაიღუპა ერთი ადამიანი. უკრაინის შეიარაღებული ძალების დაზუსტებული ინფორმაციით, რუსეთმა კიევის წინააღმდეგ 59 „შაჰედის“ ტიპის დრონი გაუშვა, მათგან 58 უკრაინის თავდაცვამ გაანადგურა.