რუსმა ულტრანაციონალისტმა და კრემლის იდეოლოგმა ალექსანდრ დუგინმა პატივი მიაგო თავისი ქალიშვილის, დარია დუგინას ხსოვნას.
მოსკოვში, ოსტანკინოს სატელევიზიო ცენტრში, დუგინას გამოსამშვიდობებელი პანაშვიდი მიმდინარეობს.
ალექსანდრ დუგინი, რომელიც წლების განმავლობაში ახალი რუსული იმპერიის შექმნას უჭერდა მხარს, რომელსაც რუსეთი მეზობელი ქვეყნების ტერიტორიები უნდა შთაენთქა, პანაშვიდზე სიტყვით გამოვიდა და განაცხადა, რომ მისი ქალიშვილი რუსეთისთვის გარდაიცვალა.
"თუ მისი ტრაგიკული სიკვდილი ვინმეს შეეხო, ის სთხოვდა მათ, დაეცვათ წმინდა მართლმადიდებლობა, ხალხი და სამშობლო. ის გარდაიცვალა რუსეთისთვის, სამშობლოში და ფრონტზე, რომელიც არის არა უკრაინაში, არამედ აქ", - თქვა დუგინმა.
დარია დუგინა 20 აგვისტოს ღამით, მოსკოვში მანქანის აფეთქების შედეგად დაიღუპა. რუსეთის ფედერალური უსაფრთხოების სამსახურის (ФСБ) განცხადებით, დარია დუგინას მკვლელობის საქმე გახსნილია და მის უკან უკრაინის სპეცსამსახურები დგანან.
უკრაინის პრეზიდენტის აპარატის მრჩეველმა მიხაილ პოდოლიაკმა კატეგორიულად უარყო უკრაინის მონაწილეობა დარია დუგინას მკვლელობაში. მისი თქმით, დუგინას მკვლელობა იმაზე მიუთითებს, რომ რუსეთის შიგნით სხვადასხვა დაჯგუფება იბრძვის ძალაუფლებისთვის.
ამავდროულად, ცნობილი გახდა, რომ დუგინას მკვლელობაზე პასუხისმგებლობა "ნაციონალურმა რესპუბლიკურმა არმიამ" აიღო.
