უკრაინის, საქართველოსა და მოლდოვის ევროკავშირში გაწევრიანების განაცხადებს ევროკომისია განიხილავს. ეს გადაწყვეტილება მიიღეს 7 მარტს, ბრიუსელში ევროკავშირის ქვეყნების მუდმივმა წარმომადგენლებმა.
ევროკავშირის ელჩების გადაწყვეტილებით, ევროკომისია ევროკავშირის წევრობის კანდიდატის სტატუსის მისაღებად, თითოეულ აპლიკანტზე – უკრაინა, საქართველო და მოლდოვა - მოსაზრებებს ცალცალკე წარადგენს.
ევროპული კომისიის მიერ დასკვნის მომზადებას შესაძლოა, დაახლოებით, 18 თვემდე დასჭირდეს. პოზიტიური დასკვნის შემთხვევაშიც, ევროკავშირში გაწევრიანების პროცესს ჩვეულებრივ წლები სჭირდება.
აპლიკანტი ქვეყნების განაცხადების ევროპული კომისიისთვის მიწოდებას ევროკავშირში საფრანგეთის წარმომადგენლობა უზრუნველყოფს. როტაციის პრინციპით, სწორედ საფრანგეთი თავმჯდომარეობს ევროკავშირის საბჭოს.
28 თებერვალს, ევროკავშირში გაწევრიანების განაცხადს, უკრაინის პრეზიდენტმა ვოლოდიმირ ზელენსკიმ მოაწერა ხელი.
საქართველოს პრემიერ-მინისტრმა ირაკლი ღარიბაშვილმა ევროკავშირის წევრობის განაცხადს ხელი 3 მარტს მოაწერა. ამავე დღეს, განაცხადს ხელი მოაწერა მოლდოვის პრეზიდენტმა მაია სანდუმ.