ყაზახეთის პირველმა პრეზიდენტმა, ნურსულთან ნაზარბაევმა, ქვეყანაში განვითარებულ მოვლენებთან დაკავშირებით, პირველი კომენტარი გააკეთა.
გავრცელებულ ვიდეომიმართვაში ნაზარბაევი ამბობს, რომ "ყაზახეთზე განხორციელებული ორგანიზებული თავდასხმა და არეულობა მიზნად ისახავდა ქვეყნის მთლიანობის დარღვევას და სახელმწიფოებრივი საფუძვლების გამოცლას.
"ამ მოვლენებმა კიდევ ერთხელ ცხადჰყო, რომ დამოუკიდებლობას თვალის ჩინივით უნდა გავუფრთხილდეთ", - ამბობს ნაზარბაევი.
ყოფილი პრეზიდენტის განცხადებით, მას შემდეგ რაც სახელმწიფოს მეთაურის პოსტი დატოვა, დედაქალაქში იმყოფება.
"2019 წლის შემდეგ ვარ პენსიონერი და დამსახურებულად ვისვენებ ყაზახეთის დედაქალაქში, არსად წავსულვარ", თქვა ნაზარბაევმა და დასძინა, რომ ქვეყნის მმართვლ ელიტაში არავითარი კონფლიქტი ან დაპირისპირება არ არსებობს.
ნაზარბაევმა აღნიშნა, რომ ქვეყანაში განვითარებული ტრაგიკული მოვლენები გაკვეთილი უნდა გახდეს ყველასთვის. მან დაღუპულთა ოჯახებს მიუსამძიმრა და დაჰპირდა, რომ გამოძიება დაადგენს, ვინ იდგა "ტერაქტების" უკან.
მედიაში ვრცელდებოდა ცნობა, რომ ყაზახეთი არეულობების დროს, ნურსულთან ნაზარბაევმა და მისმა ოჯახმა ქვეყანა დატოვეს. მოგვიანებით, მისმა პრესსპიკერმა უარყო ეს ინფორმაცია.
ყაზახეთის პრეზიდენტის თანამდებობიდან გადადგომის შემდეგ, ნურსულთან ნაზარბაევი ქვეყანაში მნიშვნელოვან ძალაუფლებას ინარჩუნებდა. ის უვადოდ იყო უშიშროების საბჭოს მდივანი, ვიდრე არეულობების ფონზე, ამ პოსტზე პრეზიდენტი ყასიმ ჟომართ-თოყაევი ჩაანაცვლებდა.
ბოლო დღეების განმავლობაში, ნაზარბაევის ოჯახის წევრებმა, მისმა სამივე სიძემ, დატოვეს მაღალი თანამდებობები, ხოლო მისი უფროსი ქალიშვილი დარიგა პარლამენტის სხდომებზე რახანია აღარ გამოჩენილა.
ნაზარბაევის კადრების თანამდებობებიდან ჩამოშორებამ გააჩინა ეჭვი, რომ პრეზიდენტი ყასიმ ჟომართ-თოყაევი ძალაუფლების კიდევ უფრო შემომტკიცებას ესწრაფვის. პარალელურად, ბრიტანულმა Guardian-მა გაავრცელა ინფორმაცია, რომ ნაზარბაევი და თოყაევი განიხილავენ აქტივებისა და სიმდიდრის განაწილების საკითხს.
შეგახსენებთ, ყაზახეთში მასობრივი საპროტესტო აქციები გაზის გაზრდილი ფასის გამო 2 იანვარს, ქვეყნის სამხრეთ-დასავლეთით მდებარე რეგიონში დაიწყო. მოგვიანებით, საპროტესტო აქციები მთელი ქვეყნის მასშტაბით მასობრივ დემონსტრაციებში გადაიზარდა, სადაც გაჩნდა ეკონომიკური და პოლიტიკური მოთხოვნები.
მწვავე პროტესტების ფონზე გადადგა ქვეყნის მთავრობა.
4 და 5 იანვარს ვითარება განსაკუთრებით დაიძაბა ქალაქ ალმათში, სადაც დემონსტრანტებისა და უსაფრთხოების ძალების შეტაკებები გაიმართა. რასაც ქვეყანაში საგანგებო მდგომარეობის გამოცხადება მოჰყვა.
პრეზიდენტმა ყასიმ ჟომართ-თოყაევმა აქციის მონაწილეებს ტერორისტები უწოდა და მათი თავდასხმა ყაზახეთზე განხორციელებულ აგრესიის აქტად შეაფასა. თოყაევმა მითითება მისცა სამართალდამცავებს, რომ დემონსტრანტებისთვის ცეცხლი გაუფრთხილებლად გაეხსნათ.
თოყაევმა დახმარების თხოვნით კოლექტიური უსაფრთხოების ხელშეკრულების ორგანიზაციას მიმართა, რის შემდეგაც, ქვეყანაში ორგანიზაციის წევრი ქვეყნების სამხედროები განთავსდნენ.
ამ დროისთვის, ყაზახეთიდან კოლექტიური უსაფრთხოების ხელშეკრულების ორგანიზაციის სამხედრო ძალების გაყვანის პროცესი მიმდინარეობს, რომლის დასრულებაც 19 იანვარს არის ნავარაუდევი.
ყაზახეთის ხელისუფლების ცნობით, საპროტესტო აქციებისას 225 ადამიანი დაიღუპა.