ყაზახეთში საპროტესტო აქციების დროს დაიღუპა 225 ადამიანი, მათ შორის 19 სამართალდამცავი. ამის შესახებ გენერალური პროკურატურის წარმომადგენელმა, სერიკ შალაბაევმა ბრიფინგზე განაცხადა.
როგორც შალაბაევმა ჟურნალისტებს უთხრა, "დაღუპულთა შორის არიან შეიარაღებული ტერორისტები, რომლებიც მონაწილეობდნენ თავდასხმაში ძალოვანი სტრუქტურების შენობებზე".
შალაბაევმა ასევე თქვა, რომ დაღუპულთა შორის 19 პოლიციელი და ჯარისკაცია. "არის მშვიდობიანი მოსახლეობაც", - დასძინა მან.
მისი თქმით, დაახლოებით 4500 ადამიანი დაშავდა. მათგან სამი ათასზე მეტი პოლიციელი და ეროვნული გვარდიის ჯარისკაცია.
შალაბაევმა განაცხადა, რომ მონაცემები ჯერ კიდევ ზუსტდება და დააკონკრეტა, რომ სამართალდამცველებმა ცეცხლი "მხოლოდ ტერორისტებს" გაუხსნეს.
მანამდე ხელისუფლება, 164 ადამიანის დაღუპვის შესახებ იტყობინებოდა, რაც ტექნიკურ შეცდომას მიაწერეს.
მისივე თქმით, ამ საქმესთან დაკავშირებით აღძრული 546 სისხლის სამართლის საქმე, მათ შორის 44 - ტერორისტული აქტების მოწყობაზე, 34 - არეულობების ორგანიზებასა და 15- მკვლელობებზე.
თავის მხრივ, ჯანდაცვის სამინისტრომ განაცხადა, რომ 225 დაღუპულიდან, სამედიცინო დაწესებულებებში 175 პაციენტი გარდაიცვალა. უწყების ცნობით, კიდევ 67 ადამიანი ამ დროისთვის ინტენსიური თერაპიის განყოფილებაში კრიტიკულ მდგომარეობაში იმყოფება.
შეგახსენებთ, ყაზახეთში მასობრივი საპროტესტო აქციები გაზის გაზრდილი ფასის გამო 2 იანვარს, ქვეყნის სამხრეთ-დასავლეთით მდებარე რეგიონში დაიწყო. მოგვიანებით, საპროტესტო აქციები მთელი ქვეყნის მასშტაბით მასობრივ დემონსტრაციებში გადაიზარდა, სადაც გაჩნდა ეკონომიკური და პოლიტიკური მოთხოვნები.
მწვავე პროტესტების ფონზე გადადგა ქვეყნის მთავრობა.
4 და 5 იანვარს ვითარება განსაკუთრებით დაიძაბა ქალაქ ალმათში, სადაც დემონსტრანტებისა და უსაფრთხოების ძალების შეტაკებები გაიმართა.
პრეზიდენტმა ყასიმ ჟომართ-თოყაევმა აქციის მონაწილეებს ტერორისტები უწოდა და მათი თავდასხმა ყაზახეთზე განხორციელებულ აგრესიის აქტად შეაფასა. თოყაევმა მითითება მისცა სამართალდამცავებს, რომ დემონსტრანტებს ცეცხლი გაუფრთხილებლად გაუხსნან.
თოყაევმა დახმარების თხოვნით კოლექტიური უსაფრთხოების ხელშეკრულების ორგანიზაციას მიმართა, რის შემდეგაც, ქვეყანაში ორგანიზაციის წევრი ქვეყნების სამხედროები განთავსდნენ.
ამ დროისთვის, ყაზახეთიდან კოლექტიური უსაფრთხოების ხელშეკრულების ორგანიზაციის სამხედრო ძალების გაყვანის პროცესი მიმდინარეობს, რომლის დასრულებაც 19 იანვარს არის ნავარაუდევი.