ყაზახეთში მიმდინარე აქციებისას 164 ადამიანი დაიღუპა. ქვეყნის უმსხვილეს ქალაქ ალმათიში დაღუპულია 103 ადამიანი, მათ შორის ორი ბავშვი.
როგორ ტელეარხი "ხაბარ-24" ჯანდაცვის სამინისტროზე დაყრდნობით იუწყება, სამედიცინო დახმარება 2 200-ზე მეტ ადამიანს დასჭირდა.
ამ დროისათვის სამედიცინო დაწესებულებებში 719 ადამიანი რჩება. მათ შორის 83 დაშავებულის მდგომარეობა მძიმეა.
საპროტესტო აქციებზე სამართალდამცავებმა 6 000-მდე ადამიანი დააკავეს.
შინაგან საქმეთა სამინისტროს ინფორმაციით, დაკავებულია 5 969 პირი. თავის მხრივ, პრეზიდენტის ადმინისტრაცია იუწყება, რომ დაკავებულთა შორის მნიშვნელოვან რაოდენობას უცხოელები შეადგენენ.
მხოლოდ ალმათიში, გასული დღე ღამის განმავლობაში, პოლიციამ 100-მდე ადამიანი დააკავა.
პრეზიდენტის ადმინისტრაციის ცნობით, ვითარება მთელს ყაზახეთში დასტაბილურებულია. მათივე განცხადებით, დედაქალაქ ნურ-სულთანსა და ალმათიში ვითარების სტაბილიზაციაში ადგილობრივ ხელისუფლებას დახმარებას კოლექტიური უსაფრთხოების ხელშეკრულების ორგანიზაციის სამშვიდობო ძალები უწევენ, რომლებიც ამ ორ დიდ ქალაქში არიან დისლოცირებულნი.
ადგილობრივი მედიის ცნობით, ალმათის ცალკეულ რაიონებში ისმის სროლის ხმა, რაც "სავარაუდოდ გამაფრთხილებელ გასროლას ჰგავს".
დემონსტრაციების შედეგად, ქალაქ ალმათიში დაზიანებულია ავტომობილები, სავაჭრო ობიექტები, ადმინისტრაციული შენობები. ხელისუფლების ინფორმაციით, ზარალი 200 მილიონ დოლარს აჭარბებს.
შეგახსენებთ, ყაზახეთში მასობრივი საპროტესტო აქციები გაზის გაზრდილი ფასის გამო 2 იანვარს, ქვეყნის სამხრეთ-დასავლეთით მდებარე რეგიონში დაიწყო. მოგვიანებით, საპროტესტო აქციები მთელი ქვეყნის მასშტაბით მასობრივ დემონსტრაციებში გადაიზარდა, სადაც გაჩნდა ეკონომიკური და პოლიტიკური მოთხოვნები.
მწვავე პროტესტების ფონზე გადადგა ქვეყნის მთავრობა.
4 და 5 იანვარს ვითარება განსაკუთრებით დაიძაბა ქალაქ ალმათში, სადაც დემონსტრანტებისა და უსაფრთხოების ძალების შეტაკებები გაიმართა.
პრეზიდენტმა ყასიმ ჟომართ-თოყაევმა აქციის მონაწილეებს ტერორისტები უწოდა და მათი თავდასხმა ყაზახეთზე განხორციელებულ აგრესიის აქტად შეაფასა. თოყაევმა მითითება მისცა სამართალდამცავებს, რომ დემონსტრანტებს ცეცხლი გაუფრთხილებლად გაუხსნან.
თოყაევმა დახმარების თხოვნით კოლექტიური უსაფრთხოების ხელშეკრულების ორგანიზაციას მიმართა, რის შემდეგაც, ქვეყანაში ორგანიზაციის წევრი ქვეყნების სამხედროები განთავსდნენ. კოლექტიური სამშვიდობო ძალების კონტინგენტში რუსეთის, ბელარუსის, სომხეთის, ტაჯიკეთისა და ყირგიზეთის დანაყოფები შედიან.
