"თუ ექიმმა გიგი უგულავას რეკომენდაცია მისცა, მისი რენომესთვის სჯობდა, არ მიეცა, რადგან ისეთი სისულელეები ილაპარაკა, სჯობდა, საერთოდ არ ელაპარაკა, არ ეღრიალა წიქარასავით", აცხადებს პარლამენტის პირველი ვიცე სპიკერი გიორგი ვოლსკი.
მისი თქმით, სჯობდა, ეს არ მომხდარიყო მისთვის და მისი პოლიტიკური პარტიისა თუ პოლიტიკური გემოვნების ინტერესებიდან გამომდინარე.
"დაარღვია თუ არა რეგულაციები, არ ვიცი“, - დასძენს ვოლსკი.
შეგახსენებთ, გუშინ, თავისუფლების მოედანზე გამართულ საპროტესტო აქციაზე სიტყვით გამოვიდა გიგი უგულავა, რომელსაც 7 ოქტომბერს კორონავირუსი დაუდასტურდა. აქციაზე უგულავამ განაცხადა, რომ არ შეეძლო აქციაზე არ მისულიყო და ექიმებს მადლობა გადაუხადა ამ შესაძლებლობისთვის.
მოგვიანებით, უგულავამ სოციალურ ქსელში დაწერა, რომ კორონავირუსის სწრაფმა ტესტმა უარყოფითი შედეგი აჩვენა და აქციაზე წასვლა ექიმებთან კონსულტაციების შემდეგ გადაწყვიტა.
აღსანიშნავია, რომ შინაგან საქმეთა მინისტრის მოადგილის განცხადებით, გიგი უგულავა კარანტინისა და იზოლაციის წესების დარღვევის გამო, შესაძლოა, დაჯარიმდეს.