პარტია "საქართველოსთვის" წევრის, დეპუტატ ანა ბუჩუკურის განცხადებით, საქართველოს მესამე პრეზიდენტი, მიხეილ სააკაშვილი პოლიტიკური პატიმარი არ არის.
ამასთან, ბუჩუკური აღნიშნავს, რომ მიხეილ სააკაშვილის მიმართ მართლმსაჯულება ყოველგვარი კითხვის ნიშნების გარეშე უნდა აღსრულდეს.
"სამართლებრივად რთულად წარმოსადგენია საპროტესტო აქციის დაკონვერტირება მიხეილ სააკაშვილის გათავისუფლებაში, თუმცა ეს „ქართულ ოცნებას“ უნდა ჰკითხოთ, რადგან პოლიტიკური საკითხია. მმართველი პარტიის პასუხისმგებლობა და ვალდებულებაა ის, რომ მართლმსაჯულება აღსრულდეს ყოველგვარი კითხვის ნიშნის გარეშე. მიხეილ სააკაშვილს რამდენიმე საქმეზე მისჯილი აქვს და ქართული სასამართლოს მიერ დამნაშავედ არის ცნობილი. რამდენიმე საქმეზე კიდევ მიმდინარეობს პროცესი და კითხვები რომ არ გაჩნდეს, სტრასბურგის სასამართლოში მიხეილ სააკაშვილის, როგორც პატიმრის, უფლებები, მათ შორის ჯანმრთელობის, დაცული უნდა იყოს. მიხეილ სააკაშვილი ჩემთვის პოლიტპატიმარი არ არის, მაგრამ მისი საქმეების მიმართ კითხვები არ უნდა გაჩნდეს", - განაცხადა ანა ბუჩუკურმა.