სენატის რესპუბლიკელთა ლიდერი და შეერთებულ შტატებში ერთ-ერთი ყველაზე გავლენიანი რესპუბლიკელი პოლიტიკოსი, წარსულში დონალდ ტრამპის მტკიცე მოკავშირე მიჩ მაკკონელი კაპიტოლიუმზე 6 იანვარს განხორციელებული თავდასხმის პროვოცირებაში ტრამპს ადანაშაულებს.
ამის შესახებ მაკკონელმა სენატის სხდომაზე განაცხადა, რომელმაც დღეს განაახლა მუშაობა.
"ხალხი ტყუილებით იკვებებოდა", - თქვა მაკკონელმა.
"ისინი პროვოცირებული იყვნენ პრეზიდენტისა და სხვა გავლენიანი ადამიანების მიერ", - დასძინა მან.
ამასთან, მიკ მაკკონელს ჯერჯერობით არ გაუკეთებია მინიშნება იმასთან დაკავშირებით, აპირებს თუ არა ტრამპის იმპიჩმენტის მხარდაჭერას, მას შემდეგ, რაც საკითხი წარმომადგენელთა პალატიდან სენატში გაიგზავნება.
6 იანვარს ვაშინგტონში ტრამპის მომხრეები შეიკრიბნენ პრეზიდენტის მხარდასაჭერად.მოგვიანებით ისინი შეიჭრნენ აშშ-ის კონგრესის შენობაში და შეწყვიტეს სხდომა, რომელზეც უნდა დამტკიცებულიყო ქვეყანაში ჩატარებული საპრეზიდენტო არჩევნების შედეგები. პოლიციასთან შეტაკების დროს ხუთი ადამიანი დაიღუპა.
მოგვიანებით, აშშ-ის კონგრესმა დაადასტურა საპრეზიდენტო არჩევნების შედეგები და ჯო ბაიდენი შეერთებული შტატების პრეზიდენტად ცნო.
კაპიტოლიუმის შტურმის შემდეგ, კონგრესის დემოკრატმა და ზოგიერთმა რესპუბლიკელმა წევრმა ტრამპი დაადანაშაულეს აჯანყების გაღვივებაში და მოითხოვეს მისი იმპიჩმენტი.
ამერიკელი კანონმდებლების ბრალდებებს დონალდ ტრამპი გაემოხმაურა და იმპიჩმენტის პროცესის წამოწყებას "კუდიანებზე ნადირობის გაგრძელება" უწოდა. მისივე თქმით, იმპიჩმენტი საშინელ რისხვას გამოიწვევს.
14 იანვარს წარმომადგენელთა პალატამ დონალდ ტრამპს იმპიჩმენტი გამოუცხადა.
