შეერთებული შტატების მოქმედმა პრეზიდენტმა, დონალდ ტრამპმა, რომლის უფლებამოსილების ვადა 20 იანვარს იწურება, ვაშინგტონში, კაპიტოლიუმზე თავდასხმის შემდეგ, ჟურნალისტებთან პირველი კომენტარი გააკეთა.
"ჩვენ არ გვსურს ძალადობა, არანაირი ძალადობა", - უთხრა მან თეთრ სახლთან შეკრებილ რეპორტიორებს ვიდრე ტეხასში, აშშ-მექსიკის საზღვარზე კედლის დასათვალიერებლად გაეშურებოდა.
დონალდ ტრამპმა ასევე კომენტარი გააკეთა კონგრესში მისი იმპიჩმენტის პროცედურის წამოწყებასთან დაკავშირებით და მას "კუდიანებზე ნადირობის გაგრძელება" უწოდა.
პრეზიდენტის თქმით, მისი იმპიჩმენტი საშინელ რისხვას გამოიწვევს.
"ეს [იმპიჩმენტი] არის პოლიტიკაში უდიდესი კუდიანებზე ნადირობის გაგრძელება. ვფიქრობ ეს საშინელ რისხვას გამოიწვევს", - განაცხადა დონალდ ტრამპმა.
აშშ-ის კონგრესის წარმომადგენელთა პალატამ გამოაქვეყნა რეზოლუციის ტექსტი შეერთებული შტატების ამჟამინდელი პრეზიდენტის დონალდ ტრამპის იმპიჩმენტის შესახებ.
წარმომადგენელთა პალატა დონალდ ტრამპს "ამბოხის წაქეზებაში“ სდებს ბრალს. მოელიან, რომ რეზოლუციის ტექსტს კონგრესის ქვედა პალატაში 13 ან 14 იანვარს უყრიან კენჭს.
რეზოლუციაში ნათქვამია, რომ დონალდ ტრამპი უსაფუძვლოდ ეჭვქვეშ აყენებდა საპრეზიდენტო არჩევნების შედეგებს. დოკუმენტში ასევე აღნიშნულია, რომ დონალდ ტრამპმა ჯორჯიის შტატის სახელმწიფო მდივანს, მისთვის საჭირო ხმების რაოდენობის მოძიება მოსთხოვა.
რეზოლუციით დემოკრატები შეერთებული შტატების ვიცე-პრეზიდენტ მაიკ პენსს მოუწოდებენ, აამოქმედოს კონსტიტუციის 25-ე შესწორება და მთავრობის კაბინეტის წევრებთან ერთად დონალდ ტრამპის უფლებამოსილების შეწყვეტის საკითხი დააყენოს. მაიკ პენსს 24 საათი აქვს იმისათვის, რათა უპასუხოს ამ მოწოდებას, წინააღმდეგ შემთხვევაში წარმომადგენელთა პალატა იმპიჩმენტის პროცედურას წამოიწყებს.
ტრამპის უფლებამოსილების ვადა 20 იანვარს იწურება, მაგრამ თუ წარმომადგენელთა პალატა და აშშ-ის სენატი პრეზიდენტს იმპიჩმენტს გამოუცხადებენ მისი საპრეზიდენტო ვადის დასრულებამდე, ტრამპი ვეღარ შეძლებს საპრეზიდენტო არჩევნებში მონაწილეობას 2024 წელს, ან სხვა არჩევითი თანამდებობის დაკავებას.
შეგახსენებთ, 6 იანვარს ვაშინგტონში ტრამპის მომხრეები შეიკრიბნენ მის მხარდასაჭერად. ისინი შეიჭრნენ აშშ-ის კონგრესის შენობაში და შეწყვიტეს სხდომა, რომელზეც უნდა დამტკიცებულიყო ქვეყანაში ჩატარებული საპრეზიდენტო არჩევნების შედეგები. პოლიციასთან შეტაკების დროს ხუთი ადამიანი დაიღუპა.
მოგვიანებით, აშშ-ის კონგრესმა დაადასტურა საპრეზიდენტო არჩევნების შედეგები და ჯო ბაიდენი შეერთებული შტატების პრეზიდენტად ცნო.
კაპიტოლიუმის შტურმის შემდეგ, კონგრესის დემოკრატმა და ზოგიერთმა რესპუბლიკელმა წევრმა ტრამპი დაადანაშაულეს აჯანყების გაღვივებაში და მოითხოვეს მისი იმპიჩმენტი.
