ბათუმის მერის მოვალეობის შემსრულებელმა არჩილ ჩიქოვანმა გერმანიის რეკონსტრუქციის ბანკის - KfW-ს პროექტების მენეჯერებთან ონლაინ შეხვედრა გამართა.
შეხვედრაზე ბათუმში მიმდინარე და დაგეგმილი ერთობლივი პროექტები განიხილეს.
მათ შორის, ევროკავშირის ენერგოეფექტურ სტანდარტებთან დაახლოების მიზნით განხორციელებული ღონისძიებები, რის შედეგადაც, ბათუმი პირველი ქალაქი გახდება საქართველოში, რომელსაც ენერგოეფექტური ტექნოლოგიებით მოდერნიზებული საბავშვო ბაღები ექნება. პროექტი მოიცავს 25 ბაღსა და 1 კულტურული მემკვიდრეობის ძეგლს.
პროექტის ფარგლებში უკვე ჩატარდა ტექნიკური-ეკონომიკური კვლევა და გამოცხადდა საერთაშორისო ტენდერი კონულტანტის შერჩევის მიზნით, რომელმაც ბათუმის მერიასთან ერთად უნდა იმუშაოს პროექტის განხორციელებაზე. ამ ეტაპზე საკონტრაქტო მოლაპარაკებები მიმდინარეობს, რის შემდეგაც საბავშვო ბაღების ენერგოაუდიტი განხორიელდება.
პროექტის ბიუჯეტი შეადგენს 7.55 მილიონ ევროს გრანტის სახით და 1.5 მლნ ევროს - ბათუმის მერიის თანამონაწილეობის სახით.
ასევე განიხილეს ბათუმის სატრანსპორტო ინფრასტრუქტურის განვითარების პროექტი, რომლის მიზანია ბათუმში გამოწვეული ჰაერის დაბინძურების და სათბური ემისიების შემცირება სატრანსპორტო საშუალებებსა და სატრანსპორტო ინფრასტრუქტურის გამოყენებაზე მოთხოვნის შემცირების გზით.
პროექტის განსახორციელებლად უკვე ჩატარდა სატრანსპორტო მობილობის ტექნიკურ-ეკონომიკური კვლევა, რომელიც საერთაშორისო ორგანიზაცია GOPA-მ განახორციელა.
პროექტი ითვალისწინებს კერძო და საზოგადოებრივი ტრანსპორტის სერვისების მონიტორინგის ჭკვიანი სატრანსპორტო კონტროლის სისტემის საშუალებით უზრუნველყოფას, ასევე, კომფორტულ და ყველასთვის ხელმისაწვდომ საზოგადოებრივ ტრანსპორტს ქალაქის მაგისტრალურ ხაზებზე, საზოგადოებრივი ტრანსპორტის ინფრასტრუქტურის გაუმჯობესებას როგორც ქვეითების, ასევე, ველოსიპედით მოსარგებლეებისთვის.
პროექტის საინვესტიციო ღირებულება 30 მლნ ევროს შეადგენს.