აჭარის მთავრობის თავმჯდომარის, თორნიკე რიჟვაძის ხელმძღვანელობით კორონავირუსთან დაკავშირებით შექმნილი ოპერატიული შტაბის სხდომა გაიმართა, რომელსაც შტაბის წევრებთან ერთად საქართველოს ჯანდაცვის მინისტრის მოადგილე თამარ გაბუნია ესწრებოდა.
შტაბის ფორმატში განიხილეს რეგიონში არსებული ეპიდემიოლოგიური ვითარება და იმსჯელეს საქართველოს უწყებათაშორისი საკოორდინაციო საბჭოს მიერ დღეს მიღებული გადაწყვეტილებების აღსრულების მექანიზმებზე.
გადაწყვეტილებების თანახმად აჭარაში მკვეთრად მომატებული შემთხვევების გამო წესდება წერტილოვანი შეზღუდვები:
▶️ სწავლა ყველა საფეხურზე გაგრძელდება დისტანციურ რეჟიმში
▶️ 25 სექტემბრიდან, შეჩერდება მუნიციპალური ტრანსპორტის მოძრაობა, ხოლო 26 სექტემბრიდან შეჩერდება საქალაქთაშორისო ტრანსპორტის მოძრაობა (გარდა ტაქსისა)
▶️ ასევე, 25 სექტემბრიდან კაფე-ბარები, რესტორნები და კვების ობიექტები იმუშავებენ 22 საათამდე.
ონლაინ სწავლებასთან დაკავშირებით არსებული გამოწვევების დასაძლევად აჭარის განათლების სამინისტრო აწარმოებს მოლაპარაკებას დონორ ორგანიზაციებთან, რომ ოჯახებისთვის, რომლებიც ყველაზე მეტად საჭიროებენ ამ მიმართულებით დახმარებას, განხორციელდეს შესაბამისი სუბსიდირება.
სხდომაზე ეპიდემიოლოგებისგან მიიღეს ინფორმაცია აჭარაში კლინიკური მართვის ნაწილში მიღწეულ შედეგებზე და ოჯახში მკურნალობის პროტოკოლის მიმდინარეობის შესახებ.