საქართველოს საგარეო საქმეთა სამინისტროს საკონსულო დეპარტამენტის მოქალაქეთა მიღების ცენტრში, ასევე სამინისტროს სამოქალაქო მისაღებსა და სხვა ადგილებში კორონავირუსის (CODIV-19) გავრცელების პრევენციული ღონისძიებების ფარგლებში სადეზინფექციო სამუშაოები ჩატარდა.
შენობის განსაზღვრული არეალები, მათ შორის სამგზავრო ლიფტები, კიბეები, მოქალაქეთა მისაღებ სივრცეებში კარებები, კედლები და ოთახებში განთავსებული ნივთების ზედაპირები სპეციალური სადეზინფექციო ხსნარით დამუშავდა.
საგარეო საქმეთა სამინისტროს საკონსულო დეპარტამენტის მოქალაქეთა მისაღები ცენტრი ასევე აღჭურვილია სადეზინფექციო ხსნარით, ოპერატორები მოქალაქეებს და ვიზიტორებს ემსახურებიან სპეციალური პირბადეებით და სამუშაო ხელთათმანებით.
პირველადი სადეზინფექციო და დამცავი ჰიგიენური საშუალებებით აღჭურვილია საქართველოს საკონსულო დაწესებულებები საზღვარგარეთ.
საქართველოს საგარეო საქმეთა სამინისტრო საქართველოს დაავადებათა კონტროლისა და საზოგადოებრივი ჯანმრთელობის ეროვნული ცენტრის რეკომენდაციის შესაბამისად სადეზინფექციო სამუშაოებს მოქალაქეთა მომსახურების ცენტრებში ყოველ დღე განახორციელებს.
