აშშ-ის პრეზიდენტის მრჩეველმა ეროვნულ საკითხებში ჯონ ბოლტონმა Twitter-ში დაწერა, რომ თეთრი სახლი ვენესუელის პრეზიდენტს ნიკოლას მადუროს ყველანაირ შემოსავალს მოუსპობს.
„გამოვიყენებთ ყველა ინსტრუმენტს, რათა მადუროს არალეგიტიმურ რეჟიმს მოვუსპოთ შემოსავლის ყველა წყარო, ასევე ვუზრუნველყოთ დროებითი პრეზიდენტი გუაიდო და ვენესუელელი ხალხი აუცილებელი რესურსებით და მხარადჭერით, იმისთვის, რომ ქვეყანაში დემოკრატია დაბრუნდეს“, - წერს ბოლტონი.
მანამდე აშშ-ის ხელისუფლებამ სანქციები დაუწესა ვენესუელის სახელმწიფო ნავთობკომპანია PDVSA-ს. აშშ-მა დაბლოკა PDVSA-ს ყველა აქტივი და მასთან გარიგებები აკრძალა.
ვაშინგტონი მსოფლიოს ქვეყნებს მოუწოდებს დაუყოვნებლივ აღიარონ ხუან გუაიდო ვენესუელის კანონიერ დროებით პრეზიდენტად.
შეგახსენებთ, რომ ოთხშაბათს, 23 იანვარს კარაკასში ვენესუელის ამჟამინდელი პრეზიდენტის ნიკოლას მადუროს წინააღმდეგ მასშტაბური საპროტესტო აქციები დაიწყო. იმავე დღეს, ვენესუელის ეროვნული ასამბლეის პრეზიდენტმა, ოპოზიციის ლიდერმა ხუან გუაიდომ თავი ქვეყნის დროებით პრეზიდენტად გამოაცხადა.
შეერთებულმა შტატებმა, კანადამ, ბრაზილიამ, არგენტინამ, საქართველომ და სხვა ქვეყნებმა აღიარეს ხუან გუაიდო ვენესუელის დროებით პრეზიდენტად და მოუწოდეს ნიკოლას მადუროს, ხელი არ აღემართა ვენესუელაში მიმდინარე საპროტესტო აქციების მონაწილეების წინააღმდეგ. თავის მხრივ ნიკოლას მადურომ უზენაეს სასამართლოში სიტყვით გამოსვლისას კიდევ ერთხელ გამოაცხადა თავისი ლეგიტიმურობა და გუაიდოს "აშშ-ის მარიონეტი" უწოდა.
ხუან გუაიდოს მხარდაჭერას უცხადებენ ასევე ევროკავშირში. ამასთან საფრანგეთმა ხუან გაიდოს დროებით პრეზიდენტად აღიარების პირობა დაასახელა.
ნიკოლას მადუროს პრეზიდენტობის ლეგიტიმურობას აღიარებენ რუსეთი, თურქეთი, სირია, მექსიკა, კუბა და ბელარუსი.